palemika vakoł zakonu ab svabodzie sumleńnia
Mienš jak pa dvaccać nie źbiracca
U minułym numary “NN” pisała pra novuju redakcyju zakonu “Ab svabodzie vieravyznańniaŭ i relihijnych arhanizacyjach”, jakaja vyklikała pratesty viernikaŭ. Za tydzień na adras kamisii pa pravach čałavieka pałaty pradstaŭnikoŭ pastupiła bolš za 400 papravak da hetaha zakonaprajektu.
Ale, jak skazaŭ deputat Ivan Paškievič, anivodnaja ź ich nie była navat razhledžanaja: “Staršynia kamisii Lipkin zajaviŭ, što heta pryjšli zvaroty persanalna da jaho, deputata Lipkina, tamu jon ich unosić na razhlad nia budzie”.
Pałata pradstaŭnikoŭ imkniecca pryniać zakon jak maha chutčej, ihnarujučy navat ułasny rehlament. Na dumku I.Paškieviča, tłumačycca heta asabistym imknieńniem Uładzimiera Kanaplova, namieśnika staršyni pałaty: “Jon mnie zajaviŭ: “Ja daŭ słova ŭładyku Fiłaretu. Tamu my razhledzim zakonaprajekt na hetaj sesii, parušajučy ŭsie zakony i rehlamenty”. Uładzimier Kanaploŭ — namieśnik staršyni mižnarodnaha pravasłaŭnaha deputackaha abjadnańnia. Adnak, pavodle słovaŭ I.Paškieviča, navat hety “ruchavik” dla praciahvańnia zakonu ŭ pałacie spracoŭvaje nia poŭnaściu: 11 deputataŭ prahałasavali suprać zakonaprajektu ŭ pieršym čytańni.
12 červienia dziela supraćstajańnia zakonaprajektu była stvoranaja hramadzkaja inicyjatyva “Za svabodu vieravyznańnia”. Siarod padpisantaŭ stajać imiony Vacłava Areški, Anatola Hryckieviča, Ivana Paškieviča, Vitala Supranoviča, Aleha Trusava, Jurja Chadyki.
Jak paviedamili arhanizatary, da pratestaŭ dałučylisia ŭnijaty, ryma-kataliki. Asnoŭnaja pretenzija viernikaŭ — da artykułu, pavodle jakoha dla rehistracyi hramady treba 20 viernikaŭ. A siońnia ŭ Biełarusi 30% usich relihijnych hramadaŭ (a heta kala 700 supołak) majuć mienš za 20 čałaviek. Siabry inicyjatyvy “Za svabodu vieravyznańnia” rychtujucca da zboru podpisaŭ. Ich treba 50 tysiačaŭ, kab, zhodna ź jurydyčnymi normami, unieści papraŭki ŭ zakon.
Arkadź Šanski
Ciapier čytajuć
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2626
Kamientary