Multymiljaner-zabojca
Anhielski miljaner Nikałas van Huhstretan “zakazaŭ” svajho kankurenta. Jamu pahražaje pažyćciovaje źniavoleńnie.
Huhstretan — adzin z samych zamožnych ludziej Vialikaj Brytanii: u śpisie bahatyroŭ krainy jon staić pad numaram 159. Za 30 hod Nikałas zdoleŭ nažyć 200 młn. funtaŭ sterlinhaŭ (kala 312 młn. dalaraŭ). 57-hadovy biznesoviec zrabiŭ kapitał na zdabyčy karysnych vykapniaŭ i aperacyjach ź nieruchomaściu. Jon maje šykoŭnyja damy ŭ ZŠA, Francyi dy Zymbabve.
Huhstretan nienavidzieŭ tych, chto parušaŭ niedatykalnaść jahonych uładańniaŭ, a mienavita amataraŭ prahułak, a tamu nia hrebavaŭ stavić kalučy drot dy achoŭnikaŭ na ściežkach, što viali da jahonych pałacaŭ. Piać hadoŭ tamu, kali adzin dom miljanera ŭ Hoŭvie zhareŭ, van Huhstretan nazvaŭ piacioch niaščasnych, jakija zahinuli ŭ połymi, “nizkimi ludźmi, narkamanami — bydłam”.
Huhstretan nie saromieŭsia na ludziach zajaŭlać rečy kštałtu: “I dobra, što Osvald chłopnuŭ Kienedzi”. Adnosna pryncesy Dyjany kazaŭ, što jana “ni ŭ što nia staviła karaleŭskuju siamju”. Huhstretan siabruje z prezydentam Zymbabve Robertam Muhabe, jaki na Zachadzie maje reputacyju paŭdniovaafrykanskaha Łukašenki.
Apošnim časam Huhstretan budavaŭ “Hamilton Palace” — samy vialiki j šykoŭny zaharadny katedž u Brytanii za apošniaje stahodździe. Miljaner kazaŭ, što sam Boh zahadaŭ jamu pabudavać hety “dom na ŭzhorku” za 40 młn. funtaŭ sterlinhaŭ. Ale pažyć u im Nikałasu, vidać, nie daviadziecca. 2 kastryčnika jon moža nazaŭždy pierasialicca ŭ londanskuju turmu “Old Baily”.
Jak vyjaviła śledztva, u 1999 h. miljaner naniaŭ Devida Kroŭka dy Roberta Napa, kab tyja zabili jahonaha byłoha kampańjona Muchameda Radža. Taho spačatku pačykali nažami, a potym i “zamačyli”. Zabojcy taksama atrymali pažyćciovaje źniavoleńnie. 11 z 12 prysiažnych paličyli vinavatym i Huhstretana. Kali psychijatry paličać jaho zdarovym, miljaner trapić za kraty nazaŭždy.
Huhstretan maryŭ zbudavać sabie maŭzalej za 30 młn. funtaŭ, dzie moh by spačyvać paśla śmierci razam sa svajoj mastackaj kalekcyjaj. Ale ŭ jaho budzie jašče dastatkova času, kab padumać, što važniejšaje — vialikija hrošy ci dobraje serca.
Aleś Kudrycki
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary