Apazycyja apazycyi

***

17 listapada ŭ Miensku musić adbycca palityčnaja akcyja ŭ padtrymku niezaležnaści Biełarusi. Spačatku arhanizatary mierkavali sabrać na jaje da 5 tys. čałaviek. Adnak ciapier ź liku inicyjataraŭ vyjšli PKB, Partyja pracy, ŁDPB, AHP.

Nia choča ŭskładniać hetaj akcyjaj palityčnuju sytuacyju Partyja BNF. A voś moładzievyja palityčnyja arhanizacyi, naadvarot, nastrojenyja zrabić akcyju poŭnamaštabnaj.

Zajaŭku na praviadzieńnie 17 listapada akcyi “Za niezaležnaść!” u harvykankam padali Pavał Znaviec, Siarhiej Vysocki j Siarhiej Šynkievič. Apošni, siabar partyi BNF, patłumačyŭ karespandentu “NN”, što akcyju ładziać niezarehistravanyja Biełaruskaja partyja svabody i Abjadnanyja sacyjał-demakraty. Jon kaža, što BNF “Adradžeńnie” prychilna da jaje stavicca, ale pad zajaŭkaj Šynkievič padpisvaŭsia jak pryvatnaja asoba. Zatoje aktyŭny ŭdzieł u padrychtoŭcy akcyi biare “Małady front”. “Łukašenka tolki imituje svaju prychilnaść da niezaležnaści. Inšych srodkaŭ vykazać svaju pazycyju ŭ nas niama”, — kaža S.Šynkievič.

Akcyja maje prachodzić pad bieł-čyrvona-biełymi ściahami i lozunhami “Za niezaležnaść!”, “Biełaruski narod — haspadar svajoj krainy”, “Za demakratyju!”, “Za dabrabyt i hodnaje žyćcio!”. Pavał Sieviaryniec kaža, što “starejšyja tavaryšy” zamiest paŭnacennaj akcyi vyrašyli pravieści pikiet na płoščy Jakuba Kołasa. Moładź ža vystupaje za šeście ad taje płoščy da Opernaha teatru, dzie musić adbycca mitynh.

U aŭtorak, 12 listapada, Pavał Sieviaryniec, Siarhiej Vysocki i Viačasłaŭ Siŭčyk zładzili presavuju kanferencyju. Jany abvieścili, što, niahledziačy na zabaronu harvykankamu, akcyja adbudziecca. A ŭ sieradu, 13 listapada, i haradzkija ŭłady pierahledzieli svajo rašeńnie dy dazvolili demanstrantam pravieści majerapryjemstva.

Arhanizatary kažuć, što ich namahańniami ŭdałosia nadrukavać tolki minimalnuju kolkaść ulotak ź infarmacyjaj pra akcyju. Tym časam, za apošni tydzień za raspaŭsiud ulotak i naściennyja nadpisy byli zatrymanyja milicyjaj šeść siabroŭ BPS.

“Mnohija apazycyjnyja palityki niedaaceńvajuć pahrozu niezaležnaści Biełarusi, — kaža P.Sieviaryniec. — My ličym, što siońnia ŭ Łukašenki i Maskvy niama nijakich supiarečnaściaŭ. Idzie hulnia. Kali apazycyja nia zmoža vystupić u abaronu niezaležnaści, to hetaja apazycyja 17 listapada spynić svajo isnavańnie, prynamsi dla nas”. Pakul ničoha nie havorycca pra mahčymaść stvareńnia novaha palityčnaha ruchu ŭ abaronu niezaležnaści Biełarusi, ale pieradumovy dla hetaha ŭžo jość.

Aleh Tačony

• 0
• 0
• 0
• 0
• 0
• 0
• 0
• 0