Dziasiaty Mienski mižnarodny knižny kirmaš dy Knižnaja vystava-kirmaš adkrylisia 25 lutaha ŭ Vystaŭnym centry «BiełEkspa». Biełaruskamoŭnych knižak tam vidavočna brakavała.
| FOTA IREX-PROMEDIA |
Vice-ministar infarmacyi Stanisłaŭ Ničyparovič tłumačyć heta tym, što ajčynnyja palihrafisty i kniharaspaŭsiudniki abkładzienyja vyšejšymi padatkami, čym rasiejskija. Heta vyklikaje pastupovaje źmianšeńnie abjomu vypusku knih u Biełarusi. Praŭda, kali S.Ničyparovič kaža, što «ŭ kožnaj kniharni jość poŭny asartyment biełaruskamoŭnaj litaratury», jon abo vydaje žadanaje za realnaje, abo nie byvaje dalej za svaju viedamasnuju kniharniu «Śvietač». Navat u Horadni «poŭny asartyment» abmiažoŭvajecca dziasiatkam knih dziaržaŭnych vydaviectvaŭ. Pra rajcentry hodzie j kazać.
Paradavali stendy pryvatnych vydaviectvaŭ: «Kavaler» — z šykoŭna aformlenymi dziciačymi knihami pa-biełarusku, «Technalohija» — z humanitarnymi navinkami. Asablivy honar vydaviectva — kniha Ŭintera i Bełoŭza «Kanflikt i kampramis. Uvodziny ŭ palityčnuju navuku». Adnak naviedniki cikavilisia zbolšaha krajaznaŭčaj dy histaryčnaj litaraturaj.
«Biełaruski knihazbor» udziełu ŭ vystavie nia braŭ. Jak patłumačyŭ vykanaŭčy dyrektar H.Viniarski, ichnaja raspaŭsiudnickaja sietka adładžanaja i novych rynkaŭ zbytu ŭ Biełarusi «Knihazbor» paprostu nia bačyć.
Ukrainskaja sekcyja hladziełasia na zajzdraść pradstaŭniča. «Misija Bandery», «Historyja Tureččyny», «Ekanomika», «Kazki Eŭropy» — bahaćcie nazvaŭ pry šykoŭnaj palihrafii. 26 lutaha ŭ «Śvietačy» adkryŭsia adździeł ukrainskaj knihi. Pradstaŭnik vydaviectva «Kamianiar» žachajecca: «My zajšli ŭ tutejšyja kniharni i schapilisia za hałavu — usio zavalena rasiejskamoŭnaj pradukcyjaj. Mienavita pradukcyjaj, bo ciažka nazvać tyja vydańni jašče jak-niebudź. Na dźvie traciny heta mistyka, ezateryka i padobnaje».
Dyj na vystavie ad rasiejskamoŭnaj litaratury ŭhinalisia stały. Samy cymus — dźvie novyja knihi prozy Vasila Bykava, vydaviectvaŭ «Eksmo» i «Vahryjus». «Eksmo» apublikavała zbornik tvoraŭ V.Bykava ŭ seryi «Čyrvonaja kniha rasiejskaj prozy». My źviazalisia ź piśmieńnikam. «Nijakaj damovy z «Eksmo» ja nie padpisvaŭ!» — zajaviŭ jon. Samaje cikavaje, što da «stvareńnia» knihi prykłali ruku biełaruskija litaratary. Na internet-sajcie litara.net jany paviedamlajuć svaje imiony.
Adam Voršyč, Mikoła Buhaj
Kamientary