Maładuju biełarusku pratrymali ŭ rasijskim SIZA amal 4 hady i apraŭdali. A kampiensacyju dali takuju, nibyta ŭ tvar plunuli

Biełaruska Uljana Markava praviała svaju maładość zusim nie tak, jak chacieła b. U studzieni 2019 hoda 18‑hadovuju dziaŭčynu ź Pinska aryštavali ŭ horadzie Hubkinski ŭ Jamała-Nienieckaj aŭtanomnaj akruzie Rasii pa padazreńni ŭ narkazłačynstvach.

U miascovaj haścinicy narkakantrol znajšoŭ u Uljany i jaje 21‑hadovaha žanicha Uładzisłava Pałynia pakiecik z zabaronienymi rečyvami — 2,99 hrama, ale heta ličycca bujnym pamieram.

Jak vynikaje z publikacyj rasijskich ŚMI, maładziony pryznalisia, što nabyli narkotyki dla siabie ŭ Jekaciarynburhu.

Pačynałasia ŭsio z kryminalnaj spravy dvuch maładych spažyŭcoŭ narkotykaŭ, a zakruciłasia tak, što ŭ sudzie siadzieli dziesiać abvinavačanych. Na sajcie suda niama apublikavanaha rašeńnia, kab zrazumieć, što ich usich abjadnoŭvała — ci heta vypadkova sabranyja narkamany, ci siarod ich byli zakładčyki. A kali ŭsio ž zakładčyki, to znajomyja miž saboj ci prosta zapchnutyja ŭ adnu hrupu dziela statystyki.

Zrešty, nas cikavić tolki los biełaruski Uljany Markavaj. Jaje sudzili pa čatyroch artykułach:

• art. 210 č. 2 KK RF — udzieł u złačynnaj supolnaści (złačynnaj arhanizacyi).
• art. 228 č. 1 KK RF — niezakonnaje nabyćcio, zachoŭvańnie, pieravozka, vyrab abo pierapracoŭka narkotykaŭ biez mety zbytu ŭ značnym pamiery.
• art. 228 č. 2 KK RF — toje ž samaje, ale ŭ bujnym pamiery.
• art. 228.1 č. 4 p.p. «a», «h» KK RF — niezakonny zbyt narkotykaŭ, ździejśnieny arhanizavanaj hrupaj u bujnym pamiery.

Mahčymaje pakarańnie — ad 10 hadoŭ i choć navat da 30 hadoŭ źniavoleńnia.

Nahadajem, biełarusku aryštavali ŭ studzieni 2019 hoda. Sud pačaŭsia tolki ŭ vieraśni 2021 hoda, a skončyŭsia — u śniežni 2022. Amal čatyry hady za kratami — 1435 dzion! Adnak vynik byŭ niečakanym. Markavu pryznali nievinavataj — «vyzvalić u zale suda». Hetki ž vierdykt pačuli jašče šaściora abvinavačanych. I tolki troje, uklučna ź jaje žanichom Uładzisłavam Pałyniem, atrymali terminy.

Admietna, što ŭ 2024 hodzie ŭ tym ža sudzie prachodziŭ praces «ab kampiensacyi škody reabilitavanamu Uładzisłavu Pałyniu». To-bok atrymlivajecca, što ŭrešcie i jaho apraŭdali — ci ŭ apielacyjnaj instancyi, ci jašče na niejkim etapie.

A Uljana Markava tym časam padała ŭ sud dziela kampiensacyi za čatyry hady, praviedzienyja ŭ rasijskim SIZA.

Biełaruska raźličyła tak: miljon rasijskich rubloŭ za niezakonny kryminalny pieraśled i pa 10 tysiač rasijskich rubloŭ za kožny dzień u SIZA — razam 15,35 miljona rasijskich rubloŭ (kala 185 tysiač jeŭra). U isku havaryłasia, što za hady źniavoleńnia ŭ jaje raźvilisia depresija, biessań, pastajannyja hałaŭnyja boli i mihreni, a ŭ 2024 hodzie joj spatrebiłasia dapamoha psichaterapieŭta. Baćki i siabry pierastali ź joj mieć znosiny, ličačy, što jana sapraŭdy ŭčyniła toje, u čym jaje abvinavačvali.

Salechardski haradski sud u lutym 2025 hoda prysudziŭ joj miljon rubloŭ (kala 12 tysiač jeŭra). Abodva baki padali apielacyi: pradstaŭnik Markavaj prasiŭ pavialičyć sumu, pradstaŭnik rasijskich uładaŭ — źnizić, bo suma «nie adpaviadaje patrabavańniam razumnaści i spraviadlivaści».

Sud Jamała-Nienieckaj aŭtanomnaj akruhi Rasii 17 sakavika 2026 hoda pastaviŭ kropku.

Apielacyjnaja kalehija pryznała: doŭhaje źniavoleńnie «istotna parušyła narmalny chod žyćciadziejnaści» dziaŭčyny, sarvała vučobu, pazbaviła mahčymaści pracavać i bačycca z rodnymi i siabrami, jakija žyvuć u Biełarusi. Sud taksama pryznaŭ, što Markava była maładaja, raniej nie sudzimaja, a padčas znachodžańnia ŭ SIZA źviartałasia da miedykaŭ z vostrym hałaŭnym bolem.

Ale dalej sudździ znajšli ceły šerah pryčyn, čamu kampiensacyju treba ŭrezać.

Pa-pieršaje, na śledstvie Markava pryznavała vinu i navat napisała prychod z pavinnaj — a admoviłasia ad pakazańniaŭ tolki ŭ sudzie. Hety «samaabhavor», maŭlaŭ, i spravakavaŭ kryminalny pieraśled i jaho praciahłaść.

Pa-druhoje, pry zatrymańni Markava admoviłasia ad miedycynskaha ahladu. Sud paličyŭ, što heta paćviardžaje ŭžyvańnie narkatyčnych srodkaŭ na momant zatrymańnia i niehatyŭna charaktaryzuje dziaŭčynu.

Pa-treciaje — i heta samy admietny pasaž vyznačeńnia — sud pastaviŭ apraŭdanaj u vinu jaje koła znosin. «Pakolki Pałyń byŭ asudžany za zbyt narkotykaŭ, vynikaje, što Markava pahadžałasia z takim ładam žyćcia, tym bolš uličvajučy toj fakt, što mieła namier ustupić u šlub z Pałyniom», — napisała kalehija.

U vyniku kampiensacyju źmienšyli da 250 tysiač rasijskich rubloŭ (kala 3000 jeŭra) — kala 2 jeŭra za kožny dzień za kratami.

Bolšaha źnižeńnia sud nie ŭbačyŭ padstaŭ rabić, patłumačyŭšy heta tym, što suma ŭsio ž «nie pavinna być simvaličnaj».

• 2
• 0
• 5
• 25
• 1
• 0
• 17
• 0