28 LUTAHA
Zvolnienyja dyrektary za niavypłatu zarobkaŭ
Kiraŭnikoŭ siami pradpryjemstvaŭ, jakija nia zdoleli spraŭna płacić zarobki, źniali z pasadaŭ. Zvolnienyja dyrektary Viciebskaha zavodu žalezabetonnych kanstrukcyjaŭ, Barysaŭskaha kryštalovaha zavodu, škłozavodu «Nioman», Mienskaha parcalanavaha zavodu, «Baranavičydrevu», budtrestu №21. Dyrektar Homielskaha kambinatu budaŭničych kanstrukcyjaŭ pazbyŭsia pasady za toje, što płaciŭ zarobki kiraŭnikam dy specyjalistam, a šarahovyja rabotniki siadzieli biaz hrošaj.
Rekanstrukcyja mienskich «chruščobaŭ»
Mienharvykankam pastanaviŭ adramantavać u 2004—2006 h. 890 mienskich «chruščovak». Ich abkładuć ciepłaizalacyjnymi plitami dy nadbudujuć mansardy. Na čas ramontu žycharoŭ buduć pa čarzie vysialać. Dla hetaha sioleta pabudujuć dva damy na 100 kvateraŭ u Centralnym rajonie. Budaŭnictva budzie kaštavać 4,4 młrd. rubloŭ.
Budzie papiernia ŭ Škłovie
Premjer Hienadź Navicki zajaviŭ, što ciaham dvuch hadoŭ u Biełarusi pabudujuć zavod, jaki budzie vyrablać hazetnuju papieru. Pakul jaje davodzicca nabyvać za miažoj. 30—40% pradukcyi novaha pradpryjemstva chopić, kab zabiaśpiečyć usiu krainu. Astatniaje pojdzie na ekspart. Syraviny dla vyrabu papiery — jałovaha balastu — u nas chapaje. Najbolš vierahodna, što zbudujuć zavod na bazie škłoŭskaj papiarovaj fabryki «Spartak».
Ziamla zadarahaja
U Barysavie pravaliŭsia aŭkcyjon, ź jakoha haradzkija ŭłady sprabavali pradać čatyry ŭčastki pad katedžy: zajaŭku na ŭdzieł padaŭ tolki adzin čałaviek. Pakupnikoŭ napužała zavialikaja pačatkovaja cana — 1,4 młn. rubloŭ za ŭčastak. Nastupny aŭkcyjon — 18 sakavika.
Likvidavany Fond sacabarony moładzi
Ukazam prezydenta źlikvidavany Fond sacyjalnaj abarony moładzi. Matyvacyja — «vyniki pracy nie adpaviadali vydatkavanym srodkam». Fond stvaryli ŭ 1997 h., kab finansavać BPSM. Srodki ŭ fond prychodzili ŭ asnoŭnym ź dziaržaŭnaha fondu spryjańnia zaniataści dy respublikanskaha fondu achovy pryrody. Ciapier hrošy, što raniej išli ŭ fond, buduć nazapašvacca na rachunku Ministerstva finansaŭ.
Hiešefty «Biełkamunmašu»
«Biełkamunmaš» źbirajecca pradavać u Irak pažarnuju techniku. Suma, na jakuju budzie padpisanaja damova, jašče nie viadomaja. Pradpryjemstva budzie pastaŭlać novyja pažarnyja mašyny, sprajektavanyja na bazie «MAZaŭ». Zavod udzielničaje ŭ tenderach na pastaŭku 10 tramvajaŭ u Pieciarburh dy 20 u Baŭharyju.
Aŭtakinateatar
11 krasavika ŭ Miensku adkryjuć pieršy ŭ Biełarusi aŭtakinateatar. La parkinhu aŭtamabilnaha rynku ŭ mikrarajonie Malinaŭka pastavili vializny ekran. Adnačasova hladzieć film možna budzie z 500 lehkavikoŭ. Huk puściać na peŭnaj FM-častacie.
U Homieli hasiać «načniki»
Homielskija ŭłady zabaranili pracavać unačy 30 kramam, baram, kaviarniam dy kijoskam. Ciapier jany musiać adčyniacca nie raniej za 6-ju ranicy, a začyniacca apoŭnačy. Pryčyna — šmatlikija skarhi na amataraŭ «načnikoŭ» dy rost kolkaści złačynstvaŭ. Bolšaść začynienych kropak handlavała alkaholem dy cyharetami. U Homieli zastałosia tolki 10 načnych kramaŭ.
Naviny čyhunki
Na Mienskim vahonaramontnym zavodzie zrabili spalny vahon novaj kanstrukcyi. Chvalacca, što nadzvyčaj kamfortny: z kandycyjanerami dy ladoŭniami. Im ukamplektujuć turciahnik Viciebsk—Bieraście. Da 2010 h. miarkujecca paskoryć da 160 km/h chutkaść ruchu mižnarodnych ciahnikoŭ na ŭsioj linii Bieraście—Vorša. Ciapier hetak razhaniać ich možna tolki na peŭnych adrezkach čyhunki na Bieraściejščynie.
AK
Kamientary