Кіраўнік МЗС Літвы: З Беларуссю трэба быць цярплівымі, хоць іншым разам і апускаюцца рукі
Літве варта быць цярплівай у дасягненні таго, каб Беларусь выбрала еўрапейскі шлях развіцця, хаця іншы раз і «апускаюцца рукі». Пра гэта заявіў кіраўнік МЗС Літвы Лінас Лінкявічус 2 мая на з'ездзе літоўскіх паслоў у Вільнюсе, паведамляе BNS.
«Варта ўзгадаць, вядома ж, Беларусь, — сказаў Лінкявічус, кажучы пра знешнепалітычныя прыярытэты Літвы. — Тут, як заўсёды, ёсць пра што пагаварыць. Мы таксама верым, што Беларусь выбера еўрапейскі шлях. Гэта вера...іншым разам апускаюцца рукі, іншым разам зноў з'яўляецца нейкі шанц. Але наша задача — цярпенне, паслядоўнасць».
Пры гэтым кіраўнік МЗС падкрэсліў, што такія крокі не павінны рабіцца за кошт дэмакратычных каштоўнасцяў.
«Іншым раз журналісты пытаюцца ў нас: для вас больш важныя правы чалавека ці грузы ў Клайпедзе? Усё важна, і ўсё магчыма: і грузы ў Клайпедзе, якія ёсць і будуць, я спадзяюся, таму што гэта прагматычны інтарэс. Але і вельмі важна, каб палітзняволеныя былі на волі, каб яны не пакутавалі з-за таго, што ў іх нейкія іншыя перакананні, чым ва ўлады», — зазначыў кіраўнік знешнепалітычнага ведамства.
Нагадаем, да прызначэння міністрам замежных спраў Лінкявічус чатыры месяцы ўзначальваў пасольства Літвы ў Беларусі.
Каментары