Праваахоўныя органы растлумачылі прычыну закрыцця ў сярэдзіне дня 26 лютага, на тры гадзіны, абедзвюх ліній Мінскага метрапалітэна.
У сумесным паведамленні КДБ Беларусі і ГУУС Мінгарвыканкама ўказваецца, што сёння днём да супрацоўніка УУС па ахове Мінскага метрапалітэна звярнулася студэнтка.
Яна паведаміла, што яе ўвагу прыцягнуў тэкст СМС аднаго з пасажыраў: у ім ён паведамляў пра планы прывесці ў дзеянне выбуховае прыстасаванне ў метро.
Супрацоўнікамі ГУУС Мінгарвыканкама і УКДБ па Мінску падчас комплексу аператыўна-вышуковых мерапрыемстваў, у тым ліку з прымяненнем сучасных тэхнічных сродкаў, асоба гэтага пасажыра была ўстаноўленая, і хутка ён быў затрыманы.
Як удакладнілі ў КДБ, ім аказаўся 35-гадовы ўраджэнец Караганды (Казахстан), які пражывае ў Мінскай вобласці.
Зараз дзеянням затрыманага ўпраўленнем Следчага камітэта Рэспублікі Беларусь па Мінску даецца прававая ацэнка.
Устанаўліваецца, ці паспеў ён адправіць СМС-паведамленне з пагрозай аб мініраванні метрапалітэна, праводзяцца неабходныя следчыя дзеянні.
«Варта зазначыць, што праваахоўнымі органамі неадкладна быў ажыццёўлены ўвесь неабходны комплекс мерапрыемстваў, прадугледжаных алгарытмам дзеянняў у такіх сітуацыях. У сувязі са спыненнем працы метро для зручнасці пасажыраў гарадскія ўлады выдзелілі дадатковы грамадскі транспарт. Праца метрапалітэна была адноўленая ў 17.20», — гаворыцца ў паведамленні праваахоўнікаў.
Нагадаем, інфармацыя пра тое, што ў Мінску не працуюць абедзве лініі метро, стала з'яўляцца прыкладна ў 14.45. На розных станцыях пасажыраў прасілі без панікі пакінуць метро і скарыстацца наземным транспартам. Начальнік метрапалітэна Расціслаў Юрэня паведаміў, што «метро закрыта на падставе загаду міліцыі».
Па тэлефоне гарачай лініі, апублікаваным на сайце метрапалітэна, заявілі: «Часова прыпынены рух. Кіраўніцтва разбіраецца ў прычынах. Пацярпіце».
Прыблізна ў 16.00 у ГУУС паведамілі, што ў метрапалітэне ніякіх надзвычайных здарэнняў няма, «вядзецца адпрацоўка станцый», правяраецца інфармацыя аб магчымым знаходжанні на іх падазроных прадметаў.
У сувязі са спыненнем абедзвюх ліній метро дадаткова на маршруты наземнага транспарту было выдзелена 55 аўтобусаў, 48 тралейбусаў, шэсць трамваяў.
Па падазрэнні ў падманным мініраванні метро затрыманы жыхар Мінскай вобласці 1979 года нараджэння.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары