Пад такім загалоўкам выйшаў артыкул на тэму візыту ў Беларусь прэм’ера Дзяржсавету КНР Вэнь Цзябао ў швэйцарскай газэце Neue Zürcher Zeitung.
Сваім візытам у Беларусь прэм’ер-міністар КНР Вэн Цзябао пацьвердзіў факт існаваньня паміж Пэкінам і Менскам асаблівых адносінаў. «Менскаму тырану» тэрмінова спатрэбіліся сродкі для існаваньня яго кульгавай плянавай эканомікі, бо танны расейскі газ можа скончыцца ў любы момант, піша Neue Zürcher Zeitung.
Далей у артыкуле вядзецца пра падпісаньне кітайскім прэм’ерам і Ўладзімерам Сямашкам шэрагу пагадненьняў аб супрацоўніцтве ў сфэры эканомікі і культуры. Пры гэтым віцэ-прэм'ера У. Сямашку NNZ упарта называе прэм'ер-міністрам краіны. Старшыня ўраду Сяргей Сідорскі ў гэты дзень быў у Карэі.
Паводле выданьня, у часе сустрэчы з Вэн Цзябао Лукашэнка выказаў словы падзякі пэкінскаму рэжыму за яго палітычную, эканамічную і дыпляматычную падтрымку.
Цёплы прыём кітайскага кіраўніка ў Менску швэйцарская газэта тлумачыць адсутнасьцю сяброў у Лукашэнкі ня толькі на Захадзе, але і ў Расеі. Менавіта ў Кітая Лукашэнка навучыўся жорстка душыць нават самыя слабыя апазыцыйныя хваляваньні, дзякуючы чаму ў Беларусі і не адбылася «каляровая» рэвалюцыя, піша NZZ.
Сярод падарункаў, што прывёз з сабою ў Беларусь Вэн Цзябао, швэйцарскае выданьне вылучае дамову пра выдзяленьне беларускаму боку пакупніцкага крэдыту ў аб’ёме $500 млн. на закупку трох лініяў па вытворчасьці цэмэнту. Падкрэсьліваецца, што аб’ём ўзаемнага гандлёвага таваразвароту ў мінулым годзе ўпершыню перавысіў адзнаку ў $1 млрд. Задавальненьне Пэкіна выклікае паважлівае стаўленьне Менску да палітыкі «адзінага Кітаю», то бок адсутнасьцю паміж Беларусьсю і Тайванем дыпляматычных стасункаў.
Не пакінула па-за ўвагай Neue Zürcher Zeitung і той факт, што кіраўнік кітайскага ўраду не наведаў «кангрэс марксістаў», што акурат у гэты час зьехаліся з усяго сьвету ў беларускую сталіцу. А таксама нагадала, што кіраўнік Паднябеснай ніякім чынам не пракамэнтаваў антысэміцкія выказваньні Лукашэнкі наконт Бабруйску, якія выклікалі шырокі розгалас па ўсім сьвеце.
Беларусь і Кітай могуць адчуваць узаемасувязь і з той прычыны, што парушэньне правоў чалавеку ў абедзьвюх краінах вельмі рэдка сутыкаюцца з пратэстамі з боку заходніх палітыкаў. У выпадку з Кітаем верх бярэ бізнэс, які ставіцца вышэй за маральныя прынцыпы. А Беларусь уважаецца за сфэру ўплыву і фарпост Расеі, з чым ня можа не лічыцца Эўропа.
Каментары