Паводле не пацверджаных пакуль афіцыйных дадзеных, у Мінску затрыманы буйны беларускі бізнэсовец Аляксандр Мураўёў, сярод актываў якога — шэраг шкляных прадпрыемстваў у Беларусі і Расіі, а таксама прадпрыемства Мотавела.
Як паведамляе ej.by са спасылкай на «Беларускі партызан», у Следчым камітэце Беларусі, Камітэце дзяржбяспекі, у аддзеле па барацьбе з эканамічнымі злачынствамі МУС і ў ААТ «Мотавела» не пацвярджаюць інфармацыю аб затрыманні бізнэсоўца Аляксандра Мураўёва.
Журналісты не змаглі датэлефанавацца ні самому Мураўёў, ні ў кампанію «Мотавела Інтэр».
Як паведамляе kyky.org, акрамя самога Аляксандра Мураўёва, затрыманыя таксама два ягоныя браты і партнёры. Паводле інфармацыі крыніцы партала, усяго затрымана дзевяць чалавек. Прычына — парушэнне ўмоў інвестыцыйнага дагавора.
Аляксандр Мураўёў, займае 36-ы радок у топ-200 паспяховых і ўплывовых бізнесоўцаў Беларусі. У яго актывы ўваходзяць Шклозавод Ялізава, Белеўратара, Гомельскі шклатарны завод, Шклозавод Ворга (Смаленская вобласць), сэрвісныя і гандлёвыя прадпрыемствы ў Беларусі, Расіі і Аўстрыі. А таксама Кансорцыум МВЗ, у яго ўваходзяць Мотавела і яго даччыныя структуры (Веласіпедная кампанія МВЗ, Матацыклетная кампанія Мінск-Мота, Гандлёвая сетка Мотавела) і група прадпрыемстваў па выпуску агратэхнікі, абсталявання, ліцця і інш. У нядаўнім мінулым Мураўёў узначальваў Беларускую федэрацыю веласіпеднага спорту.
У верасні 2013 года на Мотавела, які з 2007 года знаходзіцца ў кіраванні бізнэсоўца, пабываў Аляксандр Лукашэнка. У якасці найважнейшай умовы здзелкі Мураўёў павінен быў на працягу 2007—2012 года ўкласці ў вытворчасць 20 млн даляраў і стварыць да 2012 года магутнасці па выпуску 500 тыс. ровараў і 30 тыс. матацыклаў. Хоць бізнэсоўцу не ўдалося выканаць гэтыя абяцанні, Лукашэнка пагадзіўся ў апошні раз падставіць плячо ў выглядзе растэрміновак па раней выдадзеных крэдытах. Але, мяркуючы па ўсім, гэтых мер аказалася недастаткова. Як паведамляў «Беларускі партызан», цяпер абмяркоўваецца пытанне аб нацыяналізацыі прадпрыемства.
Акрамя таго, у маі 2014 года Эканамічны суд Гомельскай вобласці адкрыў справу аб эканамічнай неплацежаздольнасці СЗАТ «Гомельскі шклатарны завод», у якое таксама інвеставаў Мураўёў. У канцы кастрычніка мінулага года было прынятае рашэнне аб ліквідацыі гэтай юрыдычнай асобы.
Летась справа аб банкруцтве была ўзбуджаная таксама ў дачыненні да ЗТАА «Еліпак», якая займаецца выпускам упакоўкі. Ужо на пачатку 2015 года Эканамічны суд Гродзенскай вобласці распачаў чарговую справу аб банкруцтве прадпрыемства, у якое інвеставаў ATEC, — лідскага вытворцы бутэлек СЗАТ «Белеўратара».
Як адзначаюць эксперты, дзяржава не можа быць зацікаўленай у тым, каб у гэты складаны час павесіць на сябе праблемнае прадпрыемства. Хутчэй за ўсё, будзе зробленая спроба знайсці новага інвестара. У 2006—2007 гг. цікавасць да «Мотавела», у прыватнасці, выяўляў холдынг Аляксандра Шакуціна «Амкадор».
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары