Pavodle nie paćvierdžanych pakul aficyjnych dadzienych, u Minsku zatrymany bujny biełaruski biznesoviec Alaksandr Muraŭjoŭ, siarod aktyvaŭ jakoha — šerah šklanych pradpryjemstvaŭ u Biełarusi i Rasii, a taksama pradpryjemstva Motavieła.
Jak paviedamlaje ej.by sa spasyłkaj na «Biełaruski partyzan», u Śledčym kamitecie Biełarusi, Kamitecie dziaržbiaśpieki, u adździele pa baraćbie z ekanamičnymi złačynstvami MUS i ŭ AAT «Motavieła» nie paćviardžajuć infarmacyju ab zatrymańni biznesoŭca Alaksandra Muraŭjova.
Žurnalisty nie zmahli datelefanavacca ni samomu Muraŭjoŭ, ni ŭ kampaniju «Motavieła Inter».
Jak paviedamlaje kyky.org, akramia samoha Alaksandra Muraŭjova, zatrymanyja taksama dva jahonyja braty i partniory. Pavodle infarmacyi krynicy partała, usiaho zatrymana dzieviać čałaviek. Pryčyna — parušeńnie ŭmoŭ inviestycyjnaha dahavora.
Alaksandr Muraŭjoŭ, zajmaje 36-y radok u top-200 paśpiachovych i ŭpłyvovych biźniesoŭcaŭ Biełarusi. U jaho aktyvy ŭvachodziać Škłozavod Jalizava, Bieleŭratara, Homielski škłatarny zavod, Škłozavod Vorha (Smalenskaja vobłaść), servisnyja i handlovyja pradpryjemstvy ŭ Biełarusi, Rasii i Aŭstryi. A taksama Kansorcyum MVZ, u jaho ŭvachodziać Motavieła i jaho daččynyja struktury (Viełasipiednaja kampanija MVZ, Matacykletnaja kampanija Minsk-Mota, Handlovaja sietka Motavieła) i hrupa pradpryjemstvaŭ pa vypusku ahratechniki, abstalavańnia, lićcia i inš. U niadaŭnim minułym Muraŭjoŭ uznačalvaŭ Biełaruskuju fiederacyju viełasipiednaha sportu.
U vieraśni 2013 hoda na Motavieła, jaki z 2007 hoda znachodzicca ŭ kiravańni biznesoŭca, pabyvaŭ Alaksandr Łukašenka. U jakaści najvažniejšaj umovy ździełki Muraŭjoŭ pavinien byŭ na praciahu 2007—2012 hoda ŭkłaści ŭ vytvorčaść 20 młn dalaraŭ i stvaryć da 2012 hoda mahutnaści pa vypusku 500 tys. rovaraŭ i 30 tys. matacykłaŭ. Choć biznesoŭcu nie ŭdałosia vykanać hetyja abiacańni, Łukašenka pahadziŭsia ŭ apošni raz padstavić plačo ŭ vyhladzie rasterminovak pa raniej vydadzienych kredytach. Ale, miarkujučy pa ŭsim, hetych mier akazałasia niedastatkova. Jak paviedamlaŭ «Biełaruski partyzan», ciapier abmiarkoŭvajecca pytańnie ab nacyjanalizacyi pradpryjemstva.
Akramia taho, u mai 2014 hoda Ekanamičny sud Homielskaj vobłaści adkryŭ spravu ab ekanamičnaj niepłaciežazdolnaści SZAT «Homielski škłatarny zavod», u jakoje taksama inviestavaŭ Muraŭjoŭ. U kancy kastryčnika minułaha hoda było pryniataje rašeńnie ab likvidacyi hetaj jurydyčnaj asoby.
Letaś sprava ab bankructvie była ŭzbudžanaja taksama ŭ dačynieńni da ZTAA «Jelipak», jakaja zajmajecca vypuskam upakoŭki. Užo na pačatku 2015 hoda Ekanamičny sud Hrodzienskaj vobłaści raspačaŭ čarhovuju spravu ab bankructvie pradpryjemstva, u jakoje inviestavaŭ ATEC, — lidskaha vytvorcy butelek SZAT «Bieleŭratara».
Jak adznačajuć ekśpierty, dziaržava nie moža być zacikaŭlenaj u tym, kab u hety składany čas paviesić na siabie prablemnaje pradpryjemstva. Chutčej za ŭsio, budzie zroblenaja sproba znajści novaha inviestara. U 2006—2007 hh. cikavaść da «Motavieła», u pryvatnaści, vyjaŭlaŭ chołdynh Alaksandra Šakucina «Amkador».
Ciapier čytajuć
Zahinuŭ były palitviazień Alaksiej Laŭkievič. Jaho vyzvalili try miesiacy tamu paśla vizitu Koŭła1
Zahinuŭ były palitviazień Alaksiej Laŭkievič. Jaho vyzvalili try miesiacy tamu paśla vizitu Koŭła
Pasoł Ukrainy pa pytańniach Biełarusi adkazaŭ na dyskusiju Viačorki i krytykaŭ Cichanoŭskaj: Vaša ŭzajemnaja nieprymalnaść adyhryvaje vielmi niekanstruktyŭnuju rolu3737
Kamientary