UEFA rezka krytykuje FIFA za dopusk forvarda ZŠA da hulni na čempijanacie śvietu paśla čyrvonaj kartki
«Nievytłumačalnaje i niedaravalnaje rašeńnie».
Jeŭrapiejski futbolny sajuz (UEFA) vystupiŭ z žorstkaj krytykaj na adras FIFA paśla taho, jak najlepšamu napadniku zbornaj ZŠA Fałarynu Bałahunu, jaki atrymaŭ čyrvonuju kartku, dazvolili zhulać u čverćfinale čempijanatu śvietu suprać Bielhii.
Pavodle dziejnych praviłaŭ FIFA, futbalist pavinien byŭ prapuścić hety matč, adnak mižnarodnaja fiederacyja zamianiła jaho dyskvalifikacyju na ŭmoŭnuju z vyprabavalnym terminam na adzin hod.
Mnohija ŚMI źviazvajuć takoje biesprecedentnaje rašeńnie z asabistym zvankom Donalda Trampa prezidentu FIFA i svajmu daŭniamu siabru Džani Infancina, adnak u samoj arhanizacyi hetyja čutki kamientavać admovilisia.
U aficyjnaj zajavie na svaim sajcie UEFA adznačyŭ, što rašeńnie prypynić aŭtamatyčnuju dyskvalifikacyju Bałahuna stała «pierachodam čyrvonaj rysy».
«Futboł, jak i luby inšy vid sportu, zasnavany na praviłach, jakija źjaŭlajucca fundamientam sumlennaj, spraviadlivaj i prazrystaj kankurencyi. Časam praviły dapuskajuć roznyja traktoŭki. U hetym vypadku — nie. Minimalnaja aŭtamatyčnaja dyskvalifikacyja na adzin matč paśla vydaleńnia nie źjaŭlajecca pradmietam abmierkavańnia i nie patrabuje rašeńnia jakoha-niebudź kampietentnaha orhana dla ŭstupleńnia ŭ siłu. Heta pryncyp, zamacavany ŭ rehłamiencie, jaki nie moža stanavicca pradmietam vyklučeńniaŭ, tym bolš pa chodzie turniru, kali niekalki inšych futbalistaŭ užo apynalisia ŭ anałahičnaj situacyi i ŭ ustanoŭlenym paradku adbyvali dyskvalifikacyju», — havorycca ŭ zajavie UEFA.
Akramia taho, jeŭrapiejskija futbolnyja čynoŭniki padkreślili, što padobny krok całkam razburaje davier da kirujučych orhanaŭ i spartyŭnych pryncypaŭ.
«Kali haranty praviłaŭ pierastajuć zabiaśpiečvać ich nieparušnaść, pad pahrozaj apynajecca sumlennaść hulni, a aŭtarytet spabornictva padryvajecca. Padobnaje rašeńnie stvaraje precedent dla biahučaha turniru, dzie anałahičnyja situacyi ciapier patrabujuć roŭnaha padychodu — na škodu samomu spabornictvu. My vykazvajem krajniaje ździŭleńnie ŭ suviazi z takim biesprecedentnym, nievytłumačalnym i nieabhruntavanym rašeńniem».
UEFA taksama nahadaŭ pra hłabalnuju adkaznaść arhanizataraŭ čempijanatu śvietu pierad usioj spartyŭnaj supolnaściu:
«Kali vykanańnie praviłaŭ bolš nie harantujecca tymi, chto abaviazany ich abaraniać, pad pahrozaj apynajucca cełasnaść hulni i davier da spabornictva».
Ślesar z Oršy biehaŭ ad vojska na radzimie, kab paśla pamierci za Pucina. Pierad adpraŭkaj na zaboj dla jaho zakacili dyskateku z afrykancami15
Ślesar z Oršy biehaŭ ad vojska na radzimie, kab paśla pamierci za Pucina. Pierad adpraŭkaj na zaboj dla jaho zakacili dyskateku z afrykancami
Pasoł Ukrainy pa pytańniach Biełarusi adkazaŭ na dyskusiju Viačorki i krytykaŭ Cichanoŭskaj: Vaša ŭzajemnaja nieprymalnaść adyhryvaje vielmi niekanstruktyŭnuju rolu4949
Kamientary