У гэтым годзе ў Беларусь вернецца абноўленая Нацыянальная тэатральная прэмія, паведаміла на прэс-канферэнцыі 24 сакавіка ў Мінску першы намеснік міністра культуры Ірына Дрыга.
Паводле яе слоў, сёлета прэмія пройдзе ў абноўленым фармаце. Па рашэнні тэатральных дзеячаў, яна будзе праводзіцца адзін раз у два гады.
«Гэта робіцца для таго, каб тэатры маглі падрыхтаваць і прадставіць на конкурс больш прэм'ер, — сказала Дрыга. — За адзін год яны не паспявалі паказаць усё, што хацелі».
Паводле слоў першага намесніка міністра, дапрацавана палажэнне аб прэміі з улікам усіх прапаноў і ў найбліжэйшыя дні яно павінна быць апублікавана.
Плануецца, адзначыла Дрыга, што конкурс будзе праводзіцца з 1 красавіка, а яго вынікі падвядуць да канца года. Заяўкі прэтэндэнты змогуць падаць з 1 красавіка да 1 мая. З 1 мая па 1 чэрвеня будзе працаваць адборачная камісія. Пасля чаго будзе абнародаваны шорт-ліст намінантаў на прэмію, затым у рамках Нацыянальнага тэатральнага тыдня, які запланаваны на лістапад-снежань, адбудуцца прагляды гэтых спектакляў. Пераможцаў назаве прафесійнае журы.
Сёлета, паведаміла Дрыга, прэмія будзе ўручацца па чатырох намінацыях: драматычны тэатр, музычны тэатр, лялечны тэатр і тэатр для дзяцей і юнацтва. Вызначаць пераможцаў з гэтага года будуць не тры, а чатыры склады журы.
Сёлета вырашылі адмовіцца ад намінацыі «Лепшая рэжысёрская работа», паколькі, адзначыла першы намеснік міністра, перамога ў намінацыі «Лепшы спектакль» ужо вызначае і лепшага рэжысёра.
«Узамен уводзяцца намінацыі «Лепшая жаночая роля» і «Лепшая мужчынская роля», — сказала яна. — Акцёры вельмі скардзіліся, што мужчынскія і жаночыя вобразы вельмі розныя і немагчыма выбраць адну «Лепшую ролю», таму было вырашана ўвесці такую навацыю».
Таксама будуць вызначаны пераможцы ганаровых намінацый за мецэнацкую дзейнасць і ўклад у тэатральнае мастацтва.
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Дзядок расказаў, як паводзіў бы сябе ў сённяшняй Беларусі і што будзе далей5
Каментары