Дырэктар гомельскай школы абверг інфармацыю аб прымусе настаўнікаў да ўступлення ў «Белую Русь»
Дырэктар гомельскай сярэдняй школы № 28 Міхаіл Дарашкоў абверг інфармацыю аб тым, што школьная адміністрацыя прымушала работнікаў уступаць у рэспубліканскае грамадскае аб'яднанне «Белая Русь».
Пра факт прымусу БелаПАН на ўмовах ананімнасці расказаў адзін з настаўнікаў школы. Паводле яго слоў, 2 лістапада на пасяджэнні педагагічнага савета адміністрацыя школы патрабавала напісаць тлумачальную ў выпадку адмовы ўступаць у «Белую Русь».
Дырэктар пацвердзіў, што 2 лістапада 14 работнікаў школы ўступілі ў «Белую Русь».
Але — абсалютна добраахвотна, падкрэсліў ён.
Гэта, паводле слоў Дарашкова, адбылося пасля пасяджэння педсавета, на якім і паступіла прапанова папоўніць шэрагі рэспубліканскай грамадскай арганізацыі. «Ніхто нікога не прасіў пісаць тлумачальныя, усё гэта няпраўда. 14 чалавек добраахвотна напісалі заявы, без усялякіх праблем. Ніколі ў жыцці я такімі справамі не практыкую», — дадаў дырэктар школы, які, дарэчы, з'яўляецца старшынёй пярвічнай арганізацыі «Белай Русі».
Раней школьная пярвічка складалася з 18 членаў, цяпер іх стала 32.
Каментары