Украіна не лічыць неабходнай дапамогу Беларусі ў арганізацыі выбараў на Данбасе, заявіў журналістам украінскі міністр замежных спраў Павел Клімкін па выніках сустрэчы кіраўнікоў МЗС «нармандскай чацвёркі» ў Мінску.
Ён адзначыў, што Беларусь з'яўляецца сябрам АБСЕ і прызнае прынцыпы і стандарты гэтай арганізацыі. Пры гэтым Клімкін указаў, што дапамогу ў арганізацыі выбараў і назірання за імі аказвае Бюро па дэмакратычных інстытутах і правах чалавека АБСЕ. Менавіта з гэтым механізмам Беларусь пагадзілася як сябра арганізацыі.
У сваю чаргу віцэ-спікер Вярхоўнай Рады Украіны Ірына Герашчанка заявіла, што краіна ў стане самастойна правесці выбары на сваёй тэрыторыі ў любым рэгіёне. Яна таксама падкрэсліла, што ў пытанне правядзення выбараў ва Украіне не павінен умешвацца і расійскі бок накшталт таго, як ён гэта рабіў у Крыме.
«Дапамога ў правядзенні выбараў нам не патрэбна, — сказала Герашчанка. — Нам патрэбна дапамога ў націску на Расію, каб яна пайшла з украінскай тэрыторыі».
Гэта пытанне было ўзнята пасля таго, як на прэс-канферэнцыі для расійскіх журналістаў 17 лістапада Лукашэнка заявіў наконт Данбаса: «…Мы гатовыя любую ролю там сыграць… Калі вы хочаце, каб мы там правялі выбары, прытым сумленна, абсалютна сумленна — мясцовыя выбары, пра якія столькі кажуць, — мы гатовыя гэта арганізаваць. Калі вы хочаце, каб гэтыя 400 кіламетраў межаў паміж Данбасам і Расіяй, паміж Украінай і Расіяй на гэтым этапе трэба закрыць, навесці парадак, — калі ласка, мы гэта зробім. Калі вы гэтага хочаце».
У цэлым, па прызнанні ўдзельнікаў сённяшняй сустрэчы, кіраўнікоў МЗС «нармандскай чацвёркі», на перамовах у Мінску, якія доўжыліся каля чатырох гадзін, якіх-небудзь прарываў дасягнута не было. «Мінскія дамоўленасці буксуюць, нават не атрымліваецца ўзгадніць паслядоўнасць захадаў, — сказаў кіраўнік МЗС Расіі Сяргей Лаўроў. — Паслядоўнасць захадаў у сферы бяспекі і палітычных рэформаў пакуль ўзгадніць не ўдаецца».
Бакі дамовіліся, што будзе працягнута работа як у «нармандскім фармаце», на ўзроўні экспертаў, юрыстаў, ваенных экспертаў, дыпламатычных прадстаўнікоў, так і ў кантактнай групе і яе падгрупах.
Каментары