Дызайнер Саша Чабатароў арыгінальна праілюстраваў крадзеж зброі ў Баранавічах ФОТА
Працы мінскага дызайнера Сашы Чабатарова становяцца ўсё больш і больш папулярнымі. Чаму? Ён простай ілюстрацыяй можна патлумачыць сэнс любой навіны, якая не пакінула мастака раўнадушным або адгукнулася ў грамадстве.
У Сашы ёсць тэлеграм-канал «Metamodernizm», дзе можна пабачыць ілюстрацыі на падзеі, якія закранулі мастака.
Сёння дызайнер праілюстраваў навіну пра тое, што з вайсковай часткі ў Баранавічах вайскоўцы выносілі са складоў зброю і прадавалі яе.
«Ілюстрацыя пра тое, што такімі тэмпамі хутка замест баявой зброі армія будзе абараняць краіну з лукам і стрэламі, палкамі капалкамі», — раскрыў сэнс ілюстрацыі дызайнер.
«Я рэагую на навіны як любы чалавек. Ёсць навіны, якія мяне закранаюць і ўражваюць менш, іншыя — больш. Часам падчас чытання прыходзяць візуальныя вобразы і ідэі. І калі я лічу гэтыя вобразы годнымі каб падзяліцца, то малюю і публікую. Спецыяльнай сістэмы ў гэтым плане няма. Гэта чалавечая рэакцыя.
А чаму мяне закранула навіна пра крадзеж зброі ў арміі? Ну гэта ж розуму неспасціжна, гэта ж надзвычайнае здарэнне, як гэта наогул магчыма і дапушчальна?! Гэта ж армія, там жа ўсё павінна быць дакладна, прадумана і без недахопаў, а атрымліваецца — вынось што хочаш».
Каментары