Суд Сальвадора прысудзіў былога прэзідэнта краіны Антоніа Сака да дзесяці гадоў турэмнага зняволення пасля таго, як ён прызнаўся ў растраце больш за $ 300 млн дзяржаўных сродкаў. Пра гэта паведамляе Reuters.
Антоніа Сака таксама прызначаны штраф у 260 млн даляраў.
Экс-прэзідэнт прызнаў віну ў жніўні. Паводле заявы яго адваката, ён зрабіў гэта ў абмен на скарачэнне турэмнага тэрміну.
Падчас расследавання пракуроры высветлілі, што грошы з дзяржбюджэту Сака траціў на сябе і сваіх набліжаных, у тым ліку больш за $ 7 млн былі выдзеленыя на патрэбы яго былой партыі — Нацыяналістычнага рэспубліканскага альянсу.
Акрамя Сака суд прыгаварыў да турэмнага зняволення шэсць былых чыноўнікаў, якія ўваходзілі ва ўрад пры экс-прэзідэнце, да пазбаўлення волі ад 3 да 16 гадоў за ўдзел у карупцыйнай дзейнасці.
Пераемнік Сака, былы прэзідэнт Сальвадора Маурысіа Фунес таксама абвінавачваецца ў карупцыі і хаваецца ў Нікарагуа з 2016 года. Яго абвінавачваюць у выкарыстанні дзяржсродкаў для аплаты асабістых рахункаў.
Антоніа Сака быў прэзідэнтам Сальвадора з 2004 па 2009 год, а Маурысіа Фунес - з 2009 па 2014 год.
Каментары