Беларуска жыве ў Партугаліі, спявае беларускі фольк і збірае поўныя залы ВІДЭА
Прапануем чытачам пачаць знаёмства з творчасцю гурта Mova Dreva з кліпа на песню «Красна сонца».
Усе кампазіцыі «Mova dreva» нараджаюцца з беларускага фальклору. Сам праект паўстаў пяць год таму ў Лісабоне. Мясцовых музыкаў згуртавала кампазітарка Кацярына Льдокава, беларуска, якая атрымала ў Партугаліі музычную адукацыю і жыве тут, піша tuzinfm.by.
Яна імкнецца надаць беларускім народным спевам новае гучанне і новы сэнс пад натхненнем ад розных культураў і традыцыяў. Адсюль і назва. Кацярына кажа, што метафара «мова дрэва» адсылае ў свет жывой прыроды, у свет легендаў і паданняў, якія напісаныя на адзінай для ўсіх мове.
Тэкст «Красна сонца» спявачка ўзяла з матэрыялаў экспедыцыі Зінаіды Мажэйкі. Аўтарская музыка да яе паўстала летась увесну. А неўзабаве рэжысёр Бруну Суарэш зняў відэа. Кацярына напісала музыку для ягонага кароткаметражнага фільма, а ён на знак падзякі зрабіў відэакліп на «Красна сонца».
Здымалі непадалёк ад Лісабона — ля закінутага маёнтка. «Некалі тут цвілі сады і жылі людзі, а пасля нічога не засталося. Гэты сюжэт перагукваецца з гісторыяй песень: большасць зь іх таксама ўжо нідзе не жыве», — заўважае спявачка і дадае, што яна зачараваная добрымі, сардэчнымі ды адначасова простымі ды шматграннымі беларускімі спевамі. І гэтае сваё захапленне яна хоча перадаць у першым альбоме «Mova Dreva», які цяпер рыхтуецца да выдання.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары