Пазняк пра праймерыз: «У гэтых людзей абсалютна няма сораму. Асабліва непрыемна здзівіў Севярынец»
Лідар КХП-БНФ Зянон Пазняк крытычна выказаўся пра працэдуру вызначэння адзінага апазіцыйнага кандыдата на прэзідэнцкія выбары-2020.
«Сістэма працуе спраўна, і Лукашэнка можа не хвалявацца. Выбары пройдуць па стандартнай рэжымнай схеме, і чарговы тэрмін узурпацыі ўлады яму забяспечаны», — адзначае кіраўнік КХП-БНФ.
«У гэтых асобаў, што сабраліся на «выбары» і якія тлумачаць свае паводзіны «праймерыз», — абсалютна няма сораму. У той час, калі грамадства наконт так званых рэжымных «выбараў» ужо даўно разабралася», — мяркуе ён.
Пазняк зазначае, што для яго не быў нечаканасцю — але ўсё роўна непрыемнае пацвердзілася — удзел Паўла Севярынца ў гэтай кампаніі.
«За апошнія месяц-паўтара Севярынец выгадна (і заслужана) выйшаў наверх у пратэстным палітычным змаганні супраць аншлюсу і за незалежнасць Беларусі. Замест таго, каб замацаваць пазіцыі і смела весці наступальную палітыку на іншым узроўні,
ён зноў уваліўся туды, адкуль выйшаў — у гнілую лахань вікаўскай «апазіцыі», якая падтрымлівае рэжымныя «выбары» і ўвекавечвае рэжым Лукашэнкі», — мяркуе дзеяч эміграцыі.
«На гэтым — багна. Фініта. Будзе шмат кандыдатаў ад «апазіцыі» (для Захаду і «говправду» — апазіцыя). І гэта пры тым, што ніводнай асобы, якая магла б стаць альтэрнатывай рэжыму і «адзіным кандыдатам», у гэтай багне няма. Яны там яшчэ ў «праймерыз» будуць бавіцца. Які ім у Беларусі «праймерыз»! І слова такога ў беларускай мове не існуе», — рэзюмуе Зянон Пазняк.
Каментары