На тэрыторыі Старога замка ў Гродне археолагі знайшлі вежу часоў Вітаўта
У ходзе археалагічных даследаванняў, якія праводзяцца ў двары Старога замка ў рамках яго рэканструкцыі, археолагі расчысцілі фрагменты падмуркаў вежы. І фактычна са 100-працэнтнай дакладнасцю можна казаць пра тое, што гэта — вежа часоў Вітаўта, паведамляе «Гродзенская праўда».
— Гэта фрагменты падмуркаў гатычнай вежы. Мяркуючы па яе размяшчэнні і габарытах, можна казаць, што гэта, хутчэй за ўсё, вежа, намаляваная на гравюры Цюндта 16 стагоддзя. На гравюры мы бачым гатычны замак на беразе Нёмана — той, які сёння прынята называць замкам Вітаўта, — распавёў Аляксандр Хацько, старшы навуковы супрацоўнік аддзела археалогіі Гродзенскага дзяржаўнага гісторыка-археалагічнага музея.
Археолагі знайшлі найбуйнейшую з чатырох вежаў замка. На гравюры яна круглая, а вось падмурак, які адкрыўся сёння, квадратны. Як тлумачаць спецыялісты, гэта заканамерна: нашы продкі будавалі круглыя вежы менавіта на квадратных падмурках. Дарэчы, падобны ёсць у Тракайскім замку.
Вызначыць памеры вежы можна па адкрытых абрысах фрагментаў. Таўшчыня сцен — каля трох метраў, знешняя даўжыня — 13—13,75 метра. Выканана яна ў традыцыйнай муроўцы для замка, характэрнай для зямель Вялікага Княства Літоўскага: камяні, а паміж імі — запаўненне з бітай цэглы з невялікімі камянямі.
Унікальнасць знаходкі ў тым, што многія гісторыкі лакалізавалі гэтую вежу ў розных месцах. Яе часткі ўскрывалі і раней, аднак невялікія фрагменты не давалі яснасці, што гэта.
У найбліжэйшы час гісторыкам і археолагам трэба будзе больш старанна даследаваць знаходку і, магчыма, удакладніць узрост цаглін па даце іх абпалу. Гэта дазволіць даведацца, калі была пабудаваная вежа.
Каментары