Кіраўніку «Белцяжмаша» Ігару Анішчанку змянілі меру стрымання з заключэння пад варту на падпіску аб нявыездзе. Інфармацыю пра гэта Tut.by паведамілі інфармаваныя крыніцы і пацвердзіў сам Анішчанка.
— Адпусцілі ўчора ўвечары, я пад падпіскай аб нявыездзе і аб неразгалошванні. Адчуваю сябе нармальна, — распавёў Ігар Анішчанка.
Раніцай 16 верасня прадстаўнікі праваахоўных органаў прыйшлі ў офісы групы кампаній «Белцяжмаш», якімі кіруюць бізнэсмены Ігар, Аляксандр і Дзмітрый Анішчанкі.
Дэпартамент фінансавых расследаванняў КДК падазрае кіраўніцтва «Белцяжмаша» ва ўхіленні ад выплаты падаткаў на суму больш за 6 млн рублёў.
Затрыманне кіраўнікоў «Белцяжмаша» адбылося праз тыдзень пасля таго, як спецслужбы апячаталі памяшканне штаба Віктара Бабарыкі. Каманда былога кіраўніка Белгазпрамбанка, які ў маі абвясціў пра свае прэзідэнцкія амбіцыі, здымала офіс у будынку па вул. В. Харужай, 25/1, які здае ў арэнду «Белцяжмаш». Пазней там размяшчаўся і Каардынацыйны савет.
Каментары