Мінздароўя выдала дазвол на ўвоз і прымяненне расійскай вакцыны «КавіВак». Што гэта за прэпарат?
Міністэрствам аховы здароўя выдадзены дазвол на ўвоз і прымяненне вакцыны «КавіВак» супраць COVID-19.
Яна распрацаваная навуковым цэнтрам імя Чумакова пры расійскай Акадэміі навук, у адрозненне ад вакцыны «ГамКавідВак» («Спутнік V»), якую распрацаваў цэнтр імя Гамалеі і якая выкарыстоўваецца ў Беларусі. Аднак «КавіВак» таксама двухкампанентны (трэба зрабіць два ўколы).
«КавіВак» распрацаваны па тым жа прынцыпе, што і класічныя вакцыны ад воспы, поліяміеліту, адзёру і іншых вірусаў. Мінздароўя адзначае, што вакцынацыя «КавіВакам» часцей пераносіцца лягчэй, чым «Спутнікам V».
Вакцына была зарэгістраваная ў Расіі ў канцы лютага 2021 года. У аснове гэтай вакцыны — інактываваны вірус SARS-CoV-2. Такая платформа выкарыстоўваецца для кітайскіх вакцын Sinopharm і Sinovac.
Мінздароўя зазначае, што «КавіВак» 6 снежня паступіў на аптэчны склад, і 13-15 снежня больш за 300 тыс. доз ужо адпраўленыя ва ўсе вобласці краіны.
Варта зазначыць, што «КавіВак» не ўхвалены Сусветнай арганізацыяй аховы здароўя.
***
Раней паведамлялася, што ў Беларусі першую дозу вакцыны («Спутнікам» і кітайскай ад Sinopharm) атрымалі 3 млн 970 тысяч чалавек, а дзве дозы — 3 млн 156 тысяч.
Каментары