Былы сілавік рэзка выказваўся пра ГУБАЗіК, вайну ва Украіне і Лукашэнку. Цяпер можа атрымаць да 4 гадоў калоніі.
Максіму Куроўскаму 40 гадоў, скончыў мясцовую школу, пасля Акадэмію МУС. Працаваў операм групы наркакантролю і процідзеяння гандлю людзьмі Пружанскага РАУС.
Затым — следчы Пружанскага райаддзела Следчага камітэта. Звольніўся ў 2020 годзе.
Куроўскі жанаты, мае дваіх малых дачок. Жонка працавала настаўніцай пачатковых класаў.
Некалькі гадоў таму мясцовая прэса нават пісала пра сям’ю Куроўскіх. Жывуць у аднушцы, мараць пабудаваць свой дом. Удзельнічаюць у розных лакальных актыўнасцях, кшталту інтэлектуальна-забаўляльных квізаў ці парадаў калясак:
«Жонка ўбачыла аб’яву, неяк няўпэўнена прапанавала Максіму паўдзельнічаць, а ён вазьмі і падтрымай ідэю.
Варта адзначыць, лёгкі на ўздым Максім (чаго нельга сказаць пра большасць мужчын, згадзіцеся) не проста прыдумаў агульную ідэю для вобразу сям’і Куроўскіх, але і ўзяў на сябе амаль усе клопаты па падрыхтоўцы. Ён пераабсталяваў каляску дачкі ў «карабель Элізабет», змайстраваў касцюмы для сябе і жонкі, якія, згодна з задумай, паўсталі ў вобразах піратаў Карыбскага мора. На той момант у сям’і падрастала толькі дачушка Ліза, — пісаў мясцовы партал budni.by. —
А два гады таму Юлія і Максім завялі яшчэ адну сямейную традыцыю — пераапранацца ў касцюмы Дзеда Мароза і Снягуркі і віншаваць родных і знаёмых з Новым годам. Кожны год напярэдадні свята яны безвынікова мітусіліся ў пошуках касцюмаў, пакуль аднойчы Максім не сказаў: «Няўжо я, чалавек з вышэйшай адукацыяй, не разбяруся, як робіцца выкрайка і з якога боку падыходзіць да швейнай машынкі?!» Так у шафе Куроўскіх з’явіліся касцюмы, якія яны апранаюць, чым дораць прыемныя эмоцыі як дзецям, так і дарослым».
Максіма Куроўскага затрымалі некалькі дзён таму, акрамя яго вядома мінімум пра траіх затрыманых з Пружан.
Як вынікае з паведамленняў сілавікоў, прэтэнзіі ўзніклі да каментараў, якія Куроўскі пакідаў у тэлеграм-чатах.
Адзначым, пісаў экс-следчы на беларускай мове:
На відэа, якое апублікаваў брэсцкі ГУБАЗіК, Максім Куроўскі кажа, што яго падазраюць у напісанні каментараў, якія абражаюць Лукашэнку. Гэта артыкул 368 КК, пакаранне ад штрафу да 4 гадоў калоніі.
Каментары