Рэферэндум ва Узбекістане: паводле афіцыйных звестак, 90% прагаласавалі за абнуленне тэрмінаў прэзідэнта Мірзіёева
Выбаршчыкі ва Узбекістане, паводле афіцыйных звестак, пераважнай большасцю галасоў падтрымалі канстытуцыйную рэформу, дзякуючы якой прэзідэнт Мірзіёеў зможа заставацца ва ўладзе да 2040 года, піша Бі-бі-сі.
Выбарчая камісія абвясціла, што больш за 90% выбаршчыкаў падтрымалі рэформу. Папраўкі павялічваюць тэрмін прэзідэнцтва з пяці да сямі гадоў і дазваляюць прэзідэнту балатавацца трэці раз. Цяпер Шаўкату Мірзіёеву 66 гадоў, ён да 83 гадоў зможа кіраваць краінай, якую ўзначаліў у 2016 годзе.
Мірзіёеў прыйшоў да ўлады пасля смерці першага прэзідэнта Узбекістана Іслама Карымава, які кіраваў краінай 26 гадоў.
Канстытуцыя Узбекістана была прынятая ў 1992 годзе. Сярод новаўвядзенняў таксама забарона смяротнага пакарання.
У цэлым змены датычаць 65% Канстытуцыі. Прэзідэнт сцвярджае, што кардынальныя рэформы ўдасканаляць кіраванне краінай і забяспечаць больш правоў для яе жыхароў, але яго крытыкі сцвярджаюць, што яны выгадныя перш за ўсё самому Мірзіёеву.
Іслам Карымаў за дзесяцігоддзі свайго кіравання ператварыў Узбекістан у адну з самых рэпрэсіўных краін у свеце. Мірзіёеў распачаў некаторыя асцярожныя крокі да паляпшэння адносін з Захадам, у прыватнасці, пры ім у краіне сталі прыцягваць турыстаў з багатых краін і адмовіліся ад найбольш адыёзных прыкладаў рэпрэсій. Адмена смяротнага пакарання ў новай Канстытуцыі ўкладваецца ў гэтае рэчышча.
Разам з тым, яго апаненты адзначаюць, што парушэнні правоў чалавека працягваюцца, у краіне няма рэальнай апазіцыі, а дзейнасць СМІ жорстка кантралюецца.
Каментары