Навукоўцы даследавалі мову дэльфінаў-афалінаў і прыйшлі да высновы, што для размовы са сваімі дзіцянятамі яны выкарыстоўваюць іншыя гукі.
Асаблівы «мацярынскі» патэрн (Motherese) прысутнічае ў розных культурах пры маўленні. Людзі звычайна мяняюць сваё маўленне пры размове з немаўлятамі такім чынам, каб прыцягнуць іх увагу, узмацніць эмацыйную прыхільнасць, дапамагчы малечы засвоіць мову.
Такое маўленне мае не толькі камунікатыўную і дыдактычную функцыі, але і дапамагае сацыялізавацца. Але доказаў існавання падобнага маўленчага шаблону сярод жывёл няшмат.
Міжнародная група навукоўцаў нядаўна апублікавала ў часопісе Proceedings of the US National Academy of Sciences (PNAS) вынікі свайго даследавання мовы дэльфінаў-афалінаў (Tursiops truncatus).
Гэты від дэльфінаў вызначаецца доўгатэрміновай сувяззю паміж маці і патомствам. Дзіцяняты афалінаў застаюцца побач з маці ад трох да шасці гадоў.
Навукоўцы даўно заўважылі, што цягам першых некалькіх месяцаў жыцця кожная афаліна выпрацоўвае сваю ўнікальную мелодыю (характэрны свіст), падобны да імя. Дэльфіны выкрыкваюць свае «імёны» ў вадзе, хутчэй за ўсё, для таго, каб сачыць адзін за адным.
Лічыцца, што «слоўнікавы запас» дэльфінаў налічвае да 14 тысяч гукавых сігналаў.
Для свайго даследавання вучоныя абралі дзікую папуляцыю дэльфінаў у заліве Сарасота на заходнім узбярэжжы амерыканскага штата Фларыда.
Даследчыкі прааналізавалі характэрныя свісткі 19 самак дэльфінаў у сітуацыях, калі яны знаходзіліся са сваімі дзіцянятамі, так і без іх. Аудыязапісы былі атрыманыя падчас ацэнкі стану здароўя гэтых жывёл па схеме «злавіў — адпусці», што праводзілася з 1984 па 2018 год.
Аналіз паказаў, што самкі ўтваралі характэрны свіст са значна больш высокімі максімальнымі частотамі і больш шырокім частотным дыяпазонам, калі яны знаходзіліся са сваім патомствам.
Навукоўцы адзначаюць, што такія адрозненні ў мове афалінаў вельмі падобныя да змен у маўленні людзей. Пры размове са сваім дзіцем маці таксама выкарыстоўваюць гукі з больш высокімі частотамі і больш шырокім дыяпазонам вышыні тону.
Для пацвярджэння атрыманых вынікаў вучоныя збіраюцца правесці аналіз характэрнага свісту дэльфінаў у больш натуральных умовах, у асяроддзі, дзе дэльфіны свабодна плаваюць.
Чытайце яшчэ:
За паўстагоддзя ў свеце стала на 69% менш дзікіх жывёл
У мінскім дэльфінарыі падчас прадстаўлення дэльфін выскачыў з басейна ВІДЭА
Прапагандысты запэўніваюць, што 196 палітвязняў ужо на свабодзе9
Каментары