З беларускіх гандлёва-забаўляльных цэнтраў могуць знікнуць кінатэатры
Для ўласнікаў беларускіх гандлёва-забаўляльных цэнтраў (ГЗЦ) кінатэатры становяцца ўсё менш цікавыя як арандатары. Гэта вынікае са звестак агляду рынку рэтэйла і гандлёвай нерухомай маёмасці, складзенага кансалтынгавай кампаніяй NAI Belarus, піша Realt.by.
У праекцыі на беларускі рынак ГЗЦ у NAI Belarus апісваюць устойлівую тэндэнцыю на рынку гандлёвай нерухомай маёмасці Расіі. Там эксперты рынку адзначаюць, што за апошнія тры гады з канцэпцый новых ГЗЦ цалкам знікаюць варыянты размяшчэння кінатэатраў.
— Пачалося ўсё з пандэміі, затым працягнулася адыходам з рынку РФ сусветных кампаній-пракатчыкаў, а завяршылася тым, што Раскамнагляд пачаў масава забараняць і «паралельныя» стужкі, і нават многія ўласныя, расійскія, бачачы ва ўсім падазроную прапаганду нетрадыцыйных адносін. У многіх ГЗЦ ужо адзначаюцца факты ліквідацыі мультыплексу і размяшчэння на іх пляцоўках іншых забаўляльных і спартыўна-забаўляльных функцый. І нават каворкінгаў, — сказана ў справаздачы.
На нашым рынку ў плане кінапракату сітуацыя некалькі больш лаяльная, аднак практыка паказвае, што для ўласнікаў ГЗЦ кінатэатры становяцца ўсё роўна нецікавыя як арандатары, адзначаюць у NAI Belarus.
— Яны і раней былі далёка не на першым месцы па выручцы, але хаця б выконвалі ролю магніта па прыцягненні значных патокаў наведвальнікаў. Цяпер жа кінатэатры пачынаюць паступова губляць гэтую функцыю, — пішуць эксперты.
Што ж тычыцца беларускага рынку гандлёвай нерухомай маёмасці ўвогуле, то трэці квартал 2023 года аказаўся для яго цалкам паспяховым.
Каментары