Сілавікі расказалі, як ім удалося знайсці абвінавачанага ў жорсткім забойстве ў Серабранцы
Аляксандр Ліпскі быў у вышуку за забойства з 2021 года. «Наша Ніва» расказвала пра рэзананснае злачынства ў доме на Ракасоўскага ў Мінску. А цяпер Следчы камітэт апублічыў версію таго, што адбывалася ў дзень забойства, а таксама як і дзе яны знайшлі Ліпскага.
У Ліпскага ўзнік канфлікт са шлюбнай парай з ягонага пад'езда — ён абвінавачваў іх у тым, што яны ўвесь час заліваюць ягоную кватэру. Аднойчы сварка перарасла ў бойку, і на Ліпскага завялі справу аб прычыненні менш цяжкага цялеснага пашкоджання. У суд абвінавачаны тады не з'явіўся, яго абвясцілі ў вышук.
Ліпскі тым часам вырашыў адпомсціць суседзям і спланаваў забойства. Але ён не ведаў, што сям'я з таго адрасу пераехала, аддаўшы кватэру сваякам — сястры жонкі і яе мужу. Такім чынам, Ліпскі забіў не таго чалавека, якога збіраўся.
Прадстаўнік СК Аляксандр Сухадольскі расказаў «Мінск-Навінам» новыя падрабязнасці забойства.
Для канспірацыі Ліпскі надзеў форменнае адзенне бацькі, каб быць падобным да супрацоўніка міліцыі, твар закрыў балаклавай, узяў скураную тэчку для дакументаў, у якую схаваў зброю. Ён чамусьці лічыў, што такая экіпіроўка не выкліча падазрэнняў у людзей, і яму адчыняць дзверы.
У той вечар муж і жонка знаходзіліся дома. Муж пацярпелай адпачываў пасля начной змены, а жанчына збіралася забраць дачку з дзіцячага садка. У дзверы пазванілі, жанчына, якая нічога не падазравала, упусціла незнаёмца. Проста з парога Ліпскі стаў пагражаць зброяй гаспадыні, загадаў ёй стаць на калені, стрэліў некалькі разоў у галаву і тулава.
Ад гукаў страляніны ў суседнім пакоі прачнуўся муж загінулай. Ён выйшаў паглядзець, што здарылася. Перад яго вачыма разгарнулася жудасная карціна: невядомы ў балаклаве стаяў над скрываўленай жонкай і наводзіў пісталет проста на яго.
Мужчыну выратавала тое, што зброя Ліпскага дала асечку. Пакуль нападнік спрабаваў стрэліць, гаспадар кватэры аказаў яму супраціў, а затым выскачыў з акна пятага паверха. Мінчук атрымаў шматлікія траўмы, але выжыў.
Ліпскага шукалі тры гады. Следчыя адпраўлялі запыты ў Расію — былі здагадкі, што ён мог хавацца ў суседняй краіне. У жніўні 2024 года сілавікі атрымалі інфармацыю пра месцазнаходжанне бацькі Ліпскага. Міліцыянеры меркавалі, што той падтрымлівае адносіны з сынам і дапамагае яму хавацца. Так і аказалася, Ліпскі быў у Мінску ў бацькі.
Падчас затрымання Ліпскі адкрыў стральбу па сілавіках, быў паранены і памёр у бальніцы. Тым не менш, на яго завялі справу аб замаху на забойства супрацоўніка органаў унутраных спраў.
Кубракоў: Ліпскі накіраваў пісталет у твар міліцыянту. Ён вёў прыцэльны агонь, але ніхто не здрыгануўся
Забойства ў Серабранцы: Ліпскі хацеў забіць не 33-гадовую суседку, а яе сястру. Але памыліўся, бо тыя памяняліся кватэрамі
«Ліквідаваны». У бальніцы памёр хлопец, якога сёння затрымалі за забойства. Ён хаваўся разам з маці тры гады
Што вядома пра хлопца, якога вінавацілі ў забойстве ў Серабранцы і застрэлілі пры затрыманні
Цяпер чытаюць
Былы міністр культуры Руслан Чарнецкі знайшоў сабе падпрацоўку9
Каментары