Папулярны малады міністр абароны Украіны ідзе ў адстаўку. У яго не было ўзаемаразумення з Сырскім

Міхаіл Фёдараў быў міністрам абароны ўсяго паўгода — з 14 студзеня 2026 года, а да таго займаў пасаду міністра лічбавай трансфармацыі. Але нават за такі кароткі тэрмін, па словах Фёдарава, удалося дасягнуць шэрагу важных вынікаў.

Адной з галоўных падзей, якія адбыліся падчас ягонага кіравання міністэрствам абароны, ён назваў адключэнне расійскіх войскаў ад сістэмы Starlink, што, па яго словах, значна знізіла іх магчымасці эфектыўна выкарыстоўваць беспілотнікі.

Фёдараў паведаміў, што Міністэрства абароны атрымала ў спадчыну бюджэтныя цяжкасці, аднак было прынята рашэнне выкарыстаць сродкі, першапачаткова прызначаныя для грашовага забеспячэння вайскоўцаў у канцы года, і накіраваць іх на закупку розных відаў сучасных беспілотных сістэм. Сярод іх — ударныя дроны сярэдняй далёкасці, FPV-дроны на валаконна-аптычным кіраванні, танныя разведвальныя беспілотнікі, наземныя рабатызаваныя комплексы, дроны-перахопнікі і далёкабойныя ўдарныя дроны. Паводле яго слоў, за чатыры месяцы было закуплена больш беспілотнікаў, чым за ўвесь папярэдні год.

Фёдараў таксама адзначыў запуск праграмы «Лагістычны лакдаўн», якая атрымала асобнае фінансаванне. Ён сцвярджае, што дзякуючы гэтай праграме, правільным закупкам і падтрымцы найбольш баяздольных падраздзяленняў удалося істотна ўскладніць лагістыку расійскіх войскаў і пачаць ізаляцыю Крыма. Акрамя гэтага, працягвалася фінансаванне праграмы «Лінія дронаў», якая забяспечвае закупку беспілотнікаў для Сіл беспілотных сістэм, а таксама была створана праграма падтрымкі сучасных штурмавых падраздзяленняў, што робяць стаўку на высокія тэхналогіі.

Яшчэ адным важным напрамкам ён назваў рэформу сістэмы дзяржаўных закупак. Была ўведзена магчымасць перадаплаты ў памеры 70 працэнтаў пры закупках праз платформу Brave1 Market, арганізаваныя першыя адкрытыя тэндары на закупку далёкабойнай артылерыі і сотняў тысяч беспілотнікаў. На яго думку, гэта дазволіла дзяржаўнаму бюджэту ашчадзіць мільярды даляраў. Таксама ўпершыню праз тэндары былі закупленыя тысячы пікапаў, багі і квадрацыклаў для патрэб войска.

Фёдараў паведаміў пра змены ў працы супрацьпаветранай абароны. Паводле яго інфармацыі, цяпер пасля кожнай масіраванай паветранай атакі пачалі праводзіцца спецыяльныя разборы дзеянняў. Ён сцвярджае, што дзякуючы гэтаму ўзровень перахопу беспілотнікаў павялічыўся з 83 да 91 працэнта, а крылатых ракет — з 47 да 87 працэнтаў. Акрамя таго, былі ўпершыню заключаныя кантракты на закупку ракет Patriot PAC-2 GEM-T і пададзена заяўка на фінансаванне закупкі ракет PAC-3 за кошт еўрапейскага крэдыту.

Ён таксама адзначыў стварэнне сістэмы базавага забеспячэння баявых брыгад і карпусоў беспілотнікамі. Паводле яго слоў, пачынаючы з ліпеня ўсе баявыя падраздзяленні павінны атрымліваць прадказальныя пастаўкі дронаў без ручнога ўмяшання, што дазволіць лепш планаваць баявыя дзеянні.

Сярод іншых дасягненняў ён назваў запуск грантавай праграмы для вытворцаў выбуховых рэчываў і ракет, а таксама пачатак маштабнай рэформы вайсковай службы. Яна прадугледжвае кантракты для ўсіх вайскоўцаў з выразна вызначанымі тэрмінамі службы і адтэрміноўкамі, павышэнне аплаты працы пяхоты і штурмавых падраздзяленняў да аднаго з самых высокіх узроўняў у свеце, адкрыццё магчымасці для прыцягнення замежных рэкрутаў і стварэнне новых механізмаў вяртання вайскоўцаў, якія самавольна пакінулі свае падраздзяленні.

Фёдараў паведаміў, што за час яго кіраўніцтва былі праведзеныя тры пасяджэнні міжнароднай кантактнай групы па абароне Украіны ў фармаце «Рамштайн». Паводле яго ацэнкі, гэта дапамагло змяніць настроі міжнародных партнёраў і аднавіць іх упэўненасць у здольнасці Украіны супрацьстаяць агрэсіі. У выніку была абвешчана падтрымка ў памеры 40 мільярдаў даляраў на бягучы год, не ўлічваючы асобнага еўрапейскага крэдыту. Таксама быў створаны механізм выкарыстання гэтага крэдыту на прыярытэтныя вайсковыя патрэбы краіны.

Асобна ён адзначыў распрацоўку ўкраінскай балістычнай ракеты. Паводле яго слоў, менавіта ў дзень адстаўкі ўрада адбыліся яе паспяховыя выпрабаванні. Ён паведаміў, што тэхнічнае заданне было істотна перапрацавана, удалося значна павысіць дакладнасць і прыкладна на 30 працэнтаў знізіць кошт распрацоўкі.

Таксама Фёдараў заявіў пра падпісанне кантракту на закупку шведскіх знішчальнікаў Gripen, якія павінны дапамагчы знішчаць расійскія самалёты і носьбітаў кіраваных авіябомбаў. Ён паведаміў пра правядзенне разам з вайскоўцамі аперацыі «Ашан», якая, паводле яго слоў, спыніла механізаваны наступ расійскіх войскаў прыкладна на паўгода. Акрамя гэтага, былі адкрытыя магчымасці для экспарту ў рамках праграмы Drone Deal з мэтай прыцягнення інвестыцый у абаронную прамысловасць, створана лабараторыя Trophy Lab для вывучэння расійскіх вайсковых тэхналогій разам з замежнымі партнёрамі і адкрыты цэнтр Defense AI Center A1 для паскарэння выкарыстання штучнага інтэлекту ў вайсковай сферы.

Разам з тым Фёдараў прызнаў, што не ўсе пастаўленыя задачы ўдалося выканаць. Паводле яго слоў, не была завершана поўная арганізацыйная рэформа Міністэрства абароны паводле стандартаў НАТА. Хоць новая структура ўжо была створаная, многія супрацоўнікі звольненыя, а шэраг рэформаў распачаты, ён лічыць, што неабходна было яшчэ больш рашуча пазбаўляцца ад людзей, якія тармазілі перамены.

Таксама ён адзначыў, што не паспеў перавесці ўсе дзяржаўныя закупкі на адкрытую тэндарную сістэму і не здолеў у поўнай меры сфармаваць культуру асабістай адказнасці за прынятыя рашэнні. Пры гэтым ён выказаў упэўненасць, што з часам такая інстытуцыйная культура будзе сфармаваная ўкраінскім грамадствам.

Напрыканцы ён падкрэсліў, што працягне працаваць над развіццём тэхналагічных і арганізацыйных магчымасцей Украіны ў сферы абароны.

Украінскія СМІ пішуць са спасылкай на інсайдараў, што прычынай адстаўкі Фёдарава стала яго процістаянне з галоўнакамандуючым украінскай арміяй Аляксандрам Сырскім.

• 1
• 0
• 0
• 0
• 0
• 0
• 0
• 0