У Расіі ў горадзе Набярэжныя Чаўны сёння быў затрыманы былы старшыня Усетатарскага грамадскага цэнтра Зінур Агліулін. У верасні сёлета ў дачыненні да яго распачалі крымінальную справу паводле артыкула КК РФ аб «распальванні міжнацыянальнай варожасці» паміж расейцамі і татарамі, піша «Радыё Свабода».
Жонка Агліуліна паведаміла, што раніцай да іх у дом уварваліся паліцэйскія і правялі ператрус. Адзін са следчых паведаміў, што на Агліуліна адкрытая крымінальная справа «за прапаганду экстрэмізму». Жонка актывіста таксама дадала, што ператрусы прайшлі і ў іншых актывістаў арганізацыі.
Паводле звестак тэлеграм-канала «Татарская якудза», летась Зінур Агліулін далучыўся да руху «Татарская народная партыя Янгарыш», які ў жніўні гэтага года быў прызнаны экстрэмісцкім Вярхоўным судом Татарстана. Агліулін нібыта ўзначальваў аддзяленне Янгарыш у Набярэжных Чаўнах і прыцягваў новых прыхільнікаў.
Усетатарскі грамадскі цэнтр (УТГЦ) — найбольш вядомае грамадска-палітычнае аб’яднанне татарскага нацыянальнага руху. Ён быў заснаваны ў 1988 годзе. У пачатку 1990-х гадоў арганізацыя патрабавала надання Татарстану паўнавартаснага суверэнітэту. У апошнія гады свайго існавання УТГЦ выступаў у падтрымку асаблівага статусу рэспублікі, а таксама ў абарону татарскай мовы як дзяржаўнай у рэгіёне.
У студзені 2021 года пракуратура Татарстана запатрабавала прызнаць УТГЦ «экстрэмісцкім». Нагляднае ведамства выявіла прыкметы экстрэмізму ў выступах татарскіх актывістаў на мітынгу ў памяць пра ахвяры расійскага захопу Казані ў XVI стагоддзі.
10 чэрвеня 2022 года УТГЦ быў прызнаны экстрэмісцкай арганізацыяй і ліквідаваны па рашэнні Вярхоўнага суда Татарстана.
Цяпер чытаюць
У Беларусі арыштавалі французскага адстаўнога вайскоўца, які захапляецца цягнікамі. Ужо тры месяцы ён у СІЗА4
Каментары
Падтрымліваем волю татарскага народа да свабоды ад крывавай расейскай імпэрыі.