Мікіта Дранец павінен быў выйсці на свабоду ў пачатку сакавіка пасля заканчэння шасцігадовага тэрміну, але ў студзені адбылося новае судовае пасяджэнне, піша тэлеграм-канал «АЧК-Беларусь».
Мікіту Дранца абвінавацілі па артыкуле 411 Крымінальнага кодэкса — за нібыта «злоснае непадпарадкаванне адміністрацыі калоніі». У выніку суд вырашыў падоўжыць яму тэрмін яшчэ на год.
Да гэтага Дранец ужо правёў як мінімум чатыры месяцы ў памяшканні камернага тыпу ў шклоўскай калоніі №17.
Цяпер 27‑гадовага жыхара Бярозы Мікіту Дранца затрымалі 2 сакавіка 2021 года ў межах крымінальнай справы супраць актывістаў анархісцкага руху з Брэсцкай вобласці. Яму былі выстаўленыя абвінавачванні ў арганізацыі або ўдзеле ў групавых дзеяннях, што парушаюць грамадскі парадак, а таксама ва ўдзеле ў нібыта злачыннай арганізацыі.
Пасля затрымання яго перавезлі ў Мінск і змясцілі ў СІЗА №1. У студзені 2022 года матэрыялы справы перадалі ў пракуратуру — уся справа так званага «Рэвалюцыйнага дзеяння» складалася з вельмі вялікай колькасці тамоў.
У красавіку 2022 года пачаўся судовы працэс у Мінскім гарадскім судзе, але яго зрабілі закрытым, спаслаўшыся на наяўнасць матэрыялаў «экстрэмісцкага характару».
У верасні 2022 года суд вынес прысуд: 6 гадоў калоніі ва ўмовах узмоцненага рэжыму і штраф. Пасля гэтага ў 2023 годзе яго этапавалі ў калонію ў Віцебску, а пазней, у 2025 годзе, перавялі ў Шклоўскую калонію.
Усяго па той справе праходзілі дзесяць палітзняволеных — каардынатарка валанцёрскай службы «Вясны» Марфа Рабкова, валанцёр Андрэй Чапюк, палітзняволеныя актывісты анархісцкага руху Акіхіра Гаеўскі-Ханада, Аляксандр Францкевіч, Аляксей Галаўко, Аляксандр Казлянка, Павел Шпетны, Мікіта Дранец, Андрэй Марач, Даніла Чуль.
Абвінавачаныя атрымалі тэрміны ад 17 да 5 гадоў. З іх, акрамя Мікіты Дранца, працягваюць адбываць пакаранне Аляксей Галаўко (атрымаў 12 гадоў) і Аляксандр Францкевіч (атрымаў 17 гадоў). Астатнія ці ўжо адбылі ўвесь тэрмін і выйшлі на свабоду, ці былі вызваленыя па памілаванні ў выніку здзелкі Аляксандра Лукашэнкі з амерыканцамі і прымусова выдвараныя за мяжу.
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм15
Каментары