Масквічы падтрымалі беларуса-дырыжора, якому трэба было здаваць іспыт у пустой зале Гнесінкі. Быў аншлаг!
Беларус Сяргей Данількевіч вучыцца ў магістратуры Гнесінкі (Расійскай акадэміі музыкі) на дырыжора. Ён распавёў у інстаграме, што будзе здаваць іспыт пры пустой залі. У выніку квіткі на канцэрт расхапалі за некалькі гадзін.
Сяргей Данількевіч нарадзіўся на Брэстчыне — у горадзе Іванава. З 6 гадоў хлопчык пачаў займацца музыкай, скончыў Іванаўскую дзіцячую школу мастацтваў імя Напалеона Орды.
Менавіта там ён засвоіў баян — настаўніца Сяргея Святлана Зіновік называла хлопца сваім самым таленавітым вучнем за 36 гадоў працы. На яго рахунку было шмат перамог у музычных конкурсах.
У 9 класе, калі паўстала пытанне — працягваць займацца музыкай ці шукаць нейкую больш зямную спецыяльнасць, — Сяргей выбраў першае. У выніку паступіў у музычнае вучылішча імя Глінкі.
А пасля паехаў ужо ў Маскву, дзе скончыў Расійскую акадэмію музыкі імя Гнесіных — вучыўся на кафедры баяна і акардэона.
У 2022 годзе Сяргей вярнуўся на радзіму — імаверна, пытанне было ў тым, што ён мусіў адслужыць у войску. Музыку адразу забралі ў спецназ — у 5‑й асобную брыгаду спецыяльнага прызначэння, якая размяшчаецца ў Мар'інай Горцы.
Падчас службы хлопец музыкі не закінуў — яго час ад часу адпраўлялі на конкурсы патрыятычнай песні (у тым ліку ў Расію). Ён напісаў песню да Дня ПДВ і ССА — спяваў пра сувязь спецназу і дэсантных войск.
Цяпер Сяргей зноў вучыцца ў Гнесінцы — цяпер ужо ў магістратуры на дырыжора. Абарону дыпломнага праекта паставілі на 26 мая на 14.30.
Спецыяльнасць творчая, таму і абарона праходзіць у форме канцэрту. Але Сяргея засмучала тое, што трэба было выступаць перад пустой залай — беларусу не было каго паклікаць для маральнай падтрымкі.
Менш за тыдзень да іспыту будучы дырыжор выклаў у інстаграме відэазварот:
— Я буду дырыжыраваць аркестрам у Гнесінцы. Канцэрт бясплатны, але ў мяне няма сяброў і знаёмых, каго я мог бы сюды паклікаць. Таму клічу вас. Прыходзьце, буду вельмі рады бачыць. Спадзяюся на вашу падтрымку, веру ў моц інстаграма.
Ролік набраў 520 тысяч праглядаў, амаль 54 тысячы лайкаў і больш за 7 тысяч рэпостаў. У выніку рэгістрацыю прыйшлося закрыць праз некалькі гадзін (а зала разлічана больш чым на 500 месцаў).
Сяргей распавёў, што атрымаў неймаверную колькасць слоў падтрымкі. Але да апошняга хваляваўся: раптам адбудзецца так, што значная колькасць людзей усё ж не прыйдзе.
Страхі не збыліся: у залі быў аншлаг. Прыйшлі і журналісты — беларус стаў сапраўднай зоркай. Сяргей называе гэты дзень адным з самых шчаслівых у жыцці.
Кажа, дзякуючы неабыякавым людзям ён паверыў у свае сілы. І хоць пакуль не мае свайго калектыву, вельмі спадзяецца яго знайсці. Сяргей абяцае, што пра яго яшчэ пачуюць.
Калі вам раптам цікава, што Сяргею паставіла ў выніку камісія, дык можам вас супакоіць — ён атрымаў пяцёрку, найвышэйшую адзнаку.
Прапагандысты запэўніваюць, што 196 палітвязняў ужо на свабодзе9
Каментары