У анексаваным Расіяй яшчэ ў 2014 годзе Севастопалі пачалі ўводзіць абмежаванні на продаж асобных харчовых тавараў. У некаторых крамах пакупнікам дазваляюць набываць не больш за тры бутэлькі расліннага алею і тры ўпакоўкі макаронных вырабаў за адзін раз, піша The Moscow Times.
Гэтыя меры звязваюць з праблемамі ў забеспячэнні Крыма таварамі і палівам, якія ўзніклі пасля пашкоджання лагістычнай і нафтавай інфраструктуры ў выніку вайны.
Яшчэ ў маі ў Севастопалі былі ўведзеныя абмежаванні на продаж бензіну — не больш за 20 літраў на чалавека. Для дызельнага паліва пачалі выкарыстоўваць талоны, а пазней паведамлялася пра часовы дэфіцыт бензіну маркі АІ-92 і АІ-95.
У чэрвені мясцовыя ўлады абвясцілі, што на частцы аўтазаправачных станцый паліва будзе адпускацца толькі па раней набытых талонах і таксама ў абмежаванай колькасці. Для кантролю за выкананнем гэтых правілаў на запраўках арганізавалі дадатковы нагляд.
Пазней падобныя абмежаванні распаўсюдзіліся на ўвесь Крым. Бензін АІ-95 пачалі прадаваць толькі па талонах, а АІ-92 — не больш за 20 літраў на адзін аўтамабіль. Таксама было забаронена заліваць паліва ў каністры. З 4 чэрвеня паведамлялася пра спыненне продажу бензіну за наяўныя грошы.
Па словах мясцовых жыхароў і экспертаў, дэфіцыт паліва ўжо адбіваецца не толькі на аўтаўладальніках, але і на эканоміцы ў цэлым. Узрастаюць выдаткі на перавозкі, што можа ўплываць на цэны на прадукты і паслугі. Таксама ўзніклі цяжкасці ў расійскіх турыстаў, якія прыехалі на паўвостраў на ўласных аўтамабілях і сутыкнуліся з праблемамі пры набыцці паліва для зваротнай дарогі.
Цяпер чытаюць
Пачобут паразважаў, ад чаго залежыць будучыня Беларусі1
Каментары