Публікацыя праграмы сацыяльна-эканамічнага развіцця супала са з’яўленнем прапагандысцкіх білбордаў.
Публікацыя праграмы сацыяльна-эканамічнага развіцця супала са з’яўленнем прапагандысцкіх білбордаў.
У чацвер 11 лістапада ў цэнтральных дзяржаўных СМІ быў апублікаваны праект праграмы сацыяльна-эканамічнага развіцця Беларусі на 2011—2015 гг. Можна не сумнявацца, што фактычна гэты праект з’яўляецца перадвыбарчай праграмай Аляксандра Лукашэнкі. Ён будзе зацверджаны на «Усебеларускім сходзе», які пройдзе 5—6 снежня ў Мінску. Амаль адначасова з публікацыяй праекту на вуліцах сталіцы пачалі масава з’яўляцца бігборды прапагандысцкага характару. Калі параўнаць гэтыя выявы з ілюстрацыйным суправаджэннем праекту праграмы ў той жа «Советской Белорусии», то можна лёгка адшукаць шмат падобнага. І там і там шчаслівыя ўсмешкі дзяцей і іх бацькоў, спартоўцы і рабочыя, лекары, навукоўцы і вайскоўцы (маладыя і ветэраны).
З новых бігбордаў можна даведацца пра лозунг, з якім на сёлетнія выбары ідзе Лукашэнка — «Разам мы Беларусь». На выбары 2006 ён ішоў пад лозунгам «За Беларусь!».
Колькі гэта каштуе
Раней партал Marketing.by паведаміў, пра нараду ў Мінгарвыканкаме, на якой было аб’яўлена, каб уладальнікі шчытоў вонкавай рэкламы ў Мінску аддалі для прапагандысцкіх плакатаў каля 50% плошчы. Па самых сціплых падліках гэта можа каштаваць рэкламнаму бізнесу ад 200 да 400 тысяч даляраў. Усяго было надрукавана (за кошт бюджэтных сродкаў) каля 800 плакатаў 6х3 м 13 відаў.
Каментары