Калядны зварот духоўнага лідара беларусаў замежжа, апостальскага візітатара беларусаў замежжа айца Аляксандра Надсана.
Калядны зварот духоўнага лідара беларусаў замежжа айца Аляксандра Надсана.
«Нязменны вобраз Айца, водбліск Ягонай спрадвечнасці, прымае выгляд слугі. Прыйшоўшы ад Дзевы Маці і не зазнаўшы змены, Ён застаецца тым, кім быў — спрадвечным Богам, — і прымае тое, чым не быў, стаўшыся чалавекам дзеля любові да людзей». Гэты гімн, які Царква пяе у Дзень Нараджэння Хрыстовага добра перадае сэнс гэтага свята, менавіта што спрадвечны Бог у сваёй любові да нас, стаецца адным з нас. Ён прыходзіць да нас не ў сіле, але як маленькае дзіцятка, чакаючы ад нас дапамогі і спагады. Аднак гэта было не звычайнае дзіцятка. Прарок Ісая больш як 700 гадоў да ягонага прыйсця казаў: «Дзіця нарадзілася нам, сын быў дадзены нам, на ягоных плячох спачыла ўлада» (Іс 9:6).
Дык можа і не дзіва, што Ягонае прыйсце ўстрывожыла тых, хто меў уладу. Дзіўная рэч — улада. Як неад’емная частка кожнага грамадскага ладу, яна ёсць формаю служэння бліжняму. Сам Хрыстос сказаў, што Ён прыйшоў «не каб Яму служылі, але каб паслужыць і аддаць жыццё за адкупленне многіх»(Мц 20:28). Тым не менш, нярэдка тыя, хто мае ўладу, паддаюцца спакусе ператварыць яе ў самамэту, як сродак самаўзвелічэння коштам іншых. Яна дзейнічае як наркотык, без якога яны не могуць жыць, і яны гатовыя на ўсякае злачынства, каб толькі ўтрымаць яе ў сваіх руках. І тады ўлада ператвараецца ў дыктатуру. Прыкладаў гэтага маем шмат у гісторыі і аж да нашых дзён.
У сувязі з трагічнымі падзеямі апошніх дзён у Беларусі шмат хто з беларусаў
сустракае свята Нараджэння Хрыстовага з трывогаю ў сэрцы. Што чакае нас у будучыні?
Няхай жа нованароджаны Хрыстос дасць супакой усім нам. Хай дасць зразуменне кіраўніком дзяржавы, што ўсякая ўлада ад Бога, і таму накладае на іх абавязак паступаць згодна з Божымі законамі, інакш яны трацяць права кіраваць іншымі. А для ўсіх нас хай будуць суцяшэннем словы Збаўцы: «Прыйдзеце да мяне ўсе спрацаваныя і абцяжараныя, і я супакою вас; вазьмеце ярмо Маё на сябе і навучыцеся ад мяне, бо Я лагодны і пакорны сэрцам — і знойдзеце супакой для душаў вашых» (Мц 11: 28–29).
а. Аляксандар Надсан
Каляды 2010 г.
-
«Большая частка сядзіць сумленна, але ціха». Павел Вінаградаў пра палітвязняў, чые прозвішчы невядомыя
-
Польскі дыпламат расказаў, як Лукашэнка ўмее «ачароўваць суразмоўцаў» і хто робіцца ягонымі ахвярамі
-
«Дык што вам яшчэ трэба, шаноўныя кіраўнікі ЕГУ?» Севярынец заклікаў беларусізаваць універсітэт, пакуль не позна
Прапагандысты запэўніваюць, што 196 палітвязняў ужо на свабодзе9
Каментары