Rasiejskaja vystava ŭ Miensku
6—9 vieraśnia ŭ Miensku projdzie pradstaŭničaja Rasiejskaja nacyjanalnaja vystava. Udzieł u joj voźmuć premjer-ministry Biełarusi j Rasiei Siarhiej Sidorski j Michaił Fradkoŭ, kiraŭniki stalicaŭ Michaił Paŭłaŭ i Jury Łužkoŭ. Na vystavie buduć pracavać ekspazycyi Nižaharodzkaj, Omskaj, Smalenskaj, Sarataŭskaj abłaściej, Mardovii, Čuvašyi, Staŭrapolla.
Pryjduć rasiejskija banki?
Niekalki ajčynnych bankaŭ u najbližejšy čas mohuć pradać kantrolny pakiet akcyj bujnym zamiežnym — u tym liku rasiejskim — bankam. Pra heta paviedamiŭ na pres-kanferencyi staršynia praŭleńnia Nacbanku Piatro Prakapovič. Pavodle jaho słoŭ, zamiežnyja banki zdolnyja investavać u resursnuju bazu biełaruskich kalehaŭ ad $100 młn da $200 młn. Ahulny ŭłasny kapitał ajčynnych bankaŭ na 1 žniŭnia skłaŭ Br3,130 trłn.
«Bohdany» pa-biełarusku
Ukrainskaja kampanija «Bohdan» (Čarkasy) užo sabrała na Homielskim aŭtaramontnym zavodzie 21 pasažyrski aŭtobus małoj klasy. Da kanca hodu budzie sabrana jašče 50. Pakul zborka idzie z ukrainskich detalaŭ. Aŭtobusy «Bohdan» (21 miesca dla siadzieńnia) źjavilisia ŭ Miensku ŭviesnu — AAT «Mindaŭh» nabyło 35 mašyn.
Starčanka ab stanie haspadarki
U sieradu była prezentavanaja 8-ja spravazdača pradstaŭnictva AAN i Ministerstva ekanomiki «Ab čałaviečym raźvićci za 2004—2005 hady». Pradstaŭnica AAN u Biełarusi Džychan Sułtanahłu zaznačyła, što ŭ Biełarusi jašče nie ŭstalavany bałans pamiž paskareńniem ekanamičnych reformaŭ i źnižeńniem ich sacyjalnych nastupstvaŭ. Adnak dadała, što vysoki ekanamičny rost daje dadatkovyja mahčymaści. Namieśnica ministra ekanomiki Taciana Starčanka narakała, što zadača dyversyfikacyi našych rynkaŭ ekspartu vykonvajecca marudna, bo asnoŭnyja fondy pradpryjemstvaŭ znošany, što adbivajecca na jakaści pradukcyi. Patrebnyja investycyi ŭ madernizacyju asnoŭnych fondaŭ, zaznačyła jana. Taksama jana skazała, što tempy pryvatyzacyi nia buduć paskoranyja.
Kamientary