Praz tydzień arenda staličnych kvateraŭ istotna padaražeje

Treci hod zapar śpiecyjalisty rynku nieruchomasci pa arendzie žylla ŭ apošnija dni lipienia čakajuć ažyjatažnaha popytu na žyllo z boku inšaharodnich žycharoŭ krainy.

Ceny na 5—10 USD «papłyli»

Rynak arendy žylla mienavita z druhoj pałovy lipienia pačaŭ pastupova aktyvizavacca. Zaraz popyt na asobnyja kvatery istotna jašče nie pavialičyŭsia, ale ŭładalniki svabodnaha žylla ŭžo zaraz pačali rychtavacca da siezonnaha ažyjatažu i pavialičvajuć cenniki pasłuh prykładna na 5—10 dołaraŭ. Pavodle infarmacyi načalnika adździeła arendy žylla ahienctva nieruchomasci «Čas pik» Siarhieja Kadoła, samaja minimalnaja cana prapanovy arendy adnapakajovych kvater isnuje siońnia ŭ Minsku ŭ zahazavanym Zavodskim rajonie i Šabanach. Haspadary tamašnich kvater žadajuć atrymać za svaje adnapakajoŭki 200 dołaraŭ plus apłata kamunalnych pasłuh. Jakasnyja adnapakajovyja kvatery ŭ spalnych rajonach kaštujuć prykładna 210—220 dołaraŭ.

Dvuchpakajovyja kvatery kaštujuć zaraz 240—250 dołaraŭ u miesiac. Adnak jakasnych dvuchpakajovak kala stancyj mietro ź biesprablemnymi haspadarami siońnia ŭžo nie chapaje. Adšukać pryvabnuju «dvojku» pa standartnamu koštu na davoli praciahły termin (nie mienš za 2 hady) stała davoli prablematyčna.

Za apošnija dva tydni pačali padciahvacca ŭhoru cenniki trochpakajovych kvater. Siońnia siaredni košt standartnaj trochpakajoŭki dasiahaje 280—300 dołaraŭ. Jakasnyja «trojki» ŭ cichich spalnych rajonach kaštujuć užo nie mienš za 350 dołaraŭ.

Naprykancy siezona dačy patańnieli da minimumu

Sapraŭdy ažyjataž na dačnuju nieruchomaść naziraŭsia ŭviesnu ź pieršych dzion maja. Zaraz bolšaść «załatoj» moładzi, jakaja zbirałasia letam «adciahnucca» pa poŭnaj, užo vykanała svaju prahramu, adnak… Davoli ciopłaje letniaje nadvorje stvaraje popyt na takoje žyllo pa pryncypu druhoj chvali. Praŭda, ceny zaraz užo značna nižejšyja, čym u pieršaj pałovie leta. Siońnia arenda davoli ŭtulnych dač, pry adlehłasci nie bolš za 50 kiłamietraŭ ad miehapolisa, kaštuje nie bolš jak 200—250 dołaraŭ za miesiac. Za karystańnie krychu praściejšych dačnych domikaŭ, ci zvyčajnych viaskovych chat za 50 kiłamietraŭ i bolš ad Minska, haspadary patrabujuć zvyčajna nie bolš za 100 dołaraŭ za miesiac.

Studencki ažyjataž «paciahnie» na plus 20 pracentaŭ

Naš ekśpiert ad ahienctva nieruchomasci «Čas pik» Siarhiej Kadoł ličyć, što mienavita praz tydzień na rynku nieruchomasci arendy žylla pačnuć aktyŭna «varušycca» studenty i abituryjenty, jakija pačnuć šukać sabie «zimovyja» kvatery. Na dumku ekśpierta, mocnaja chvala studenckaha ažyjatažu moža pryviesci da istotnaha znižeńnia prapanoŭ arendy ŭsich vidaŭ kvater. Heta, u svaju čarhu, moža pryviesci da padaražańnia arendy prykładna na 20—25 pracentaŭ. Śpiecyjalisty rynku arendy ličać, što ŭžo ŭ druhoj dekadzie žniŭnia adnapakajovyja kvatery buduć kaštavać nie mienš čym 250 dołaraŭ. Razam z tym, ekśpierty ličać, što mienavita ŭ žniŭni na rynak arendy budzie «vykinuta» šmat nie vielmi jakasnaha žylla ŭ samych drennych rajonach stalicy. Niepryvabnaje stanovišča kvatery, dzie navat kaśmietyčny ramont nie rabiŭsia na praciahu dziesiatkaŭ hadoŭ, aŭtamatyčna znižaje canu arendy prykładna na 30—60 dołaraŭ. Zaŭvažu, što zaraz adsutnaść mebli i chatniaha telefona na ŭzrovień arendy nie ŭpłyvaje ŭvohule. Siarhiej Kadoł ličyć, što siemjam, jakija zbirajucca zdymać kvatery na praciahły čas, lepš pakłapacicca ab hetym zaraz, bo praz tydzień—druhi ceny mohuć być užo inšymi, a kolkaść prapanoŭ istotna źmienšycca.

Siarhiej Kurkač, Źviazda

• 0
• 0
• 0
• 0
• 0
• 0
• 0
• 0