Nivodzin łukašenkaŭski ŚMI i kanał nie vykarystaŭ słova «retranślatary». Što heta moža aznačać?
Taktykaj Minska pakul stała zamoŭčvańnie. Ci zrobiać jany vyhlad, što nie było ni retranślataraŭ, ni ŭdaraŭ pa ich?
Mašyna prapahandy całkam zamaŭčała hałoŭnaje patrabavańnie Ukrainy — demantaž abstalavańnia, jakoje, pa mierkavańni, Kijeva, vykarystoŭvajecca dla rakietna-dronavych udaraŭ pa poŭnačy Ukrainy. Za try dni słova «retranślatary» ni razu nie zhadvajecca ni ŭ adnym ŚMI, ni ŭ adnym z tysiačy kanałaŭ prapahandy.
Zamiest hetaha prapahanda robić niekankretyzavanyja abvinavačvańni ŭ sprobach «uciahnuć Biełaruś u vajnu» i raspalvaje ŭ svaim zvykłym režymie ahulnuju nianaviść da Ukrainy, krain Jeŭropy i Uładzimira Zialenskaha.
Takoje zamoŭčvańnie kankretyki moža być vynikam taho, što naviersie abmiarkoŭvajuć, jak reahavać. Ale moža być i kančatkova vyznačanaj taktykaj. Kali Kijeŭ abmiažujecca źniščeńniem retranślataraŭ na miažy, Minsk zrobić vyhlad, što i ŭdaraŭ nie było, i retranślataraŭ nie było.
Tak, źviazany z represiŭnym aparatam łukašystaŭ kanał «Biełaruski siłavik» dekłaruje, što ad Ukrainy «nijakich dziejańniaŭ pryniata nie budzie, akramia taho, što patupaje nožkaj i pazłuje na adsutnaść kamientara z boku kiraŭnika Biełarusi. Dalejšym jaho płanam budzie zajava samoha Zialenskaha ci kahości sa śvity, jakija zajaviać, što «Biełaruś prybrała techniku paśla našaha papiaredžańnia».
U toj ža čas zamoŭčvańnie moža być i sposabam dačakać, pakul ukraincy ŭdarać pieršymi, kab stvaryć u vačach nasielnictva šok niečakanaści, uražańnie, što nie Biełaruś «pačała pieršaj», što kraina stała achviaraj ahresii.
«Jość užo peŭnyja, skažam tak, momanty, pra jakija budzie dałožana kiraŭniku dziaržavy. Rašeńnie budzie pryniata. Ale ŭciahnuć Biełaruś u kanflikt nie ŭdasca. My za mir, razvažlivaść, za vyrašeńnie ŭsich pytańniaŭ dypłamatyčnym šlacham», — zajaviŭ adnosna śledstva pa atacy na biełaruski aŭtobus u Branskaj vobłaści Rasii staršynia Rady biaśpieki RB Alaksandr Valfovič.
U niadzielu ŭsie dziaržaŭnyja ŚMI Biełarusi raspaŭsiudzili zajavu ministra abarony Viktara Chrenina.
«Vajennaja stratehija Biełarusi nakiravanaja na toje, kab harantavać biaśpieku svaich hramadzian, i nie nakiravanaja na ŭciahvańnie va ŭzbrojeny kanflikt, — zajaviŭ ministr. — Biełaruski bok abmiažoŭvajecca nazirańniem za situacyjaj i trymaje na miežach minimalna nieabchodny kantynhient vojskaŭ», — skazaŭ jon.
U 2022 hodzie ŭdar na Kijeŭ byŭ naniesieny z terytoryi Biełarusi pry łahistyčnaj dapamozie biełaruskaha boku i padtrymcy łukašenkaŭskaha prapahandysckaha aparata. Va Ukrainie zahinuli dziasiatki tysiač ludziej, akupavanyja niekalki abłaściej. Paśla parazy blickryhu rasijskija suchaputnyja vojski pakinuli Biełaruś, ale biełaruski VPK i prapahandysckaja mašyna praciahvali absłuhoŭvajuć rasijskuju armiju.
Dekłaravana raźmiaščeńnie ŭ Biełarusi rasijskaj atamnaj zbroi i «Arešnika», što źmianiła bałans siłaŭ u rehijonie i vykliča adpaviedny adkaz NATA.
Biełaruskaja apazicyja nie raz papiaredžvała, što saŭdzieł u ahresii zrobić krainu zakładnicaj impierskich ambicyj Maskvy i abjektam udaru ŭ adkaz.
Śviatłana Cichanoŭskaja 19 červienia zaklikała zrabić usio, kab nie dapuścić uciahvańnia Biełarusi ŭ vajnu.
Mikoła Statkievič zaklikaŭ ułady nie źbivać ukrainskija drony, kali tyja buduć lacieć na rasijskija retranślatary.
Kali ž udary buduć naniesienyja i pa naftapierapracoŭčych zavodach i «Azocie», Łukašenka nie zmoža rabić vyhlad, što «vsie chorošo, priekrasnaja markiza», papiaredžvaje Statkievič.
Rytoryka Kijeva pačała mianiacca z pačatku 2026 hoda. 19 červienia prezident Ukrainy Uładzimir Zialenski vystupiŭ z ultymatumam. Jon zapatrabavaŭ ciaham tydnia demantavać retranślatary ŭ pamiežnych rajonach Biełarusi, jakija vykarystoŭvajucca dla naviadzieńnia rasijskich dronaŭ na celi va Ukrainie. Inakš, papiaredziŭ Zialenski, heta zrobić sama Ukraina. Jon taksama ŭkazaŭ na pastaŭki paliva ź Biełarusi ŭ Rasiju. 20 i 21 červienia jon dvojčy paŭtaryŭ svajo papiaredžańnie.
Hety ŭltymatum vystaŭleny na fonie patavaj situacyi na frantach Danbasa, Zaparožža i Sumščyny dy ŭzmacnieńnia ŭkrainskich atak uhłyb rasijskaj terytoryi.
Ciapier čytajuć
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ66
Kamientary
[Zredahavana]