SK RF nazvaŭ proźviščy adkaznych i vykanaŭcaŭ, chto, pa jaho viersii, atakavaŭ aŭtobus ź biełaruskimi dziećmi pad Branskam
Śledčy kamitet RF nazvaŭ datyčnych da ataki na pasažyrski aŭtobus ź dziećmi ź Biełarusi ŭ Branskaj vobłaści. Siarod ich — kamandujučy Siłami bieśpiłotnych sistem USU Robiert Broŭdzi, načalnik Hałoŭnaha ŭpraŭleńnia raźviedki Minabarony Ukrainy Aleh Ivaščanka, jakija, pa viersii rasijskaha boku, addali zahad atakavać cyvilny transpart na terytoryi RF. Pra heta TASS paviedamiła aficyjny pradstaŭnik SK RF Śviatłana Piatrenka.
«Śledstvam ustanoŭlena datyčnaść da ździajśnieńnia złačynstva kamandujučaha Siłami bieśpiłotnych sistem USU Robierta Broŭdzi i načalnika Hałoŭnaha ŭpraŭleńnia raźviedki Minabarony Ukrainy Aleha Ivaščanki, jakija zabiaśpiečyli naviadzieńnie na metu i addali niezakonny zahad pra ataku na cyvilnyja transpartnyja srodki na rasijskaj terytoryi», — skazała jana.
Akramia taho, rasijski SK zajaŭlaje, što ŭstanoŭleny vykanaŭcy teraktu. U pryvatnaści, heta vajskoviec padraździaleńnia bieśpiłotnych sistem «Chimiera» 105‑ha pahraničnaha atrada Dziaržaŭnaj pahraničnaj słužby Ukrainy Dźmitryj Tkačenka, vajskoviec pahraničnaj kamiendatury chutkaha reahavańnia «Škvał» 7‑ha pahraničnaha atrada DPSU Ihar Žukaŭ i vajskoviec 73‑ha marskoha centra śpiecyjalnych apieracyj USU Uładzisłaŭ Navum.
Piatrenka paviedamiła, što ŭ adnosinach da Broŭdzi, Ivaščanki, Tkačenki, Žukava i Navuma vyniesieny pastanovy pra pryciahnieńnie ŭ jakaści abvinavačanych pa č. 3 art. 205 KK RF (ździajśnieńnie terarystyčnaha akta, jaki paciahnuŭ hibiel ludziej).
SK RF zajaviŭ, što dalej ustanaŭlivaje asoby inšych saŭdzielnikaŭ złačynstva. Rasśledavańnie kryminalnaj spravy, havorycca ŭ zajavie, idzie va ŭzajemadziejańni sa Śledčym kamitetam Respubliki Biełaruś.
Miž tym, ukrainski bok admoviŭ svaju datyčnaść da ataki.
Dziaržaŭny sakratar Rady biaśpieki Alaksandr Valfovič zajaviŭ učora, što metaj ataki na aŭtobus ź biełaruskimi dziećmi było «sutyknuć Biełaruś z Ukrainaj», ale jon nie nazvaŭ, chto staić za atakaju.
Pasažyrski aŭtobus ź dziciačaj futbolnaj kamandaj ź Biełarusi byŭ atakavany 17 červienia. Aŭtobus nakiroŭvaŭsia z Homiela ŭ Hielendžyk. U vyniku ŭdaru BPŁA adzin pasažyr zahinuŭ, vosiem paciarpieli, u tym liku šaściora dziaciej.
Ciapier čytajuć
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach1212
Kamientary