Pamior Barys Bierazoŭski. Ab hetym jaho ziać Jahor Šupie paviedamiŭ u svaim fejsbuku.
Advakat Alaksandr Dabravinski piša, što Bierazoŭski nibyta zrabiŭ suicyd. Adnak hetaja infarmacyja pakul taksama nie paćviardžajecca ź inšych krynic.
Siabra siamji Dziamjan Kudraŭcaŭ skazaŭ, što ŭ Bierazoŭskaha spyniłasia serca. Aliharcha znajšli ŭ vannym pakoi ŭ svaim domie pad Łondanam - jon žyŭ u hrafstvie Sarej - a 11-j ranicy pavodle łondanskaha času.
Barys Bierazoŭski naradziŭsia ŭ 1946 hodzie. Z 1998 pa 1999 hod jon zajmaŭ pasadu vykanaŭčaha sakratara SND.U 1999-2000 hadach byŭ deputatam Dziaržaŭnaj Dumy.
Z pačatku 2000-ch hadoŭ jon žyŭ u emihracyi ŭ Vialikabrytanii i rehularna krytykavaŭ Uładzimira Pucina i jaho palityku. U Rasii jon abvinavačvaŭsia ŭ machlarstvie, admyvańni hrošaj i sprobie hvałtoŭnaha zachopu ŭłady i byŭ zavočna prysudžany da turemnaha źniavoleńnia.
U 2008 hodzie Forbes aceńvaŭ majomaść Barysa Bierazoŭskaha ŭ $1,3 młrd.
***
22 studzienia 2011 u intervju ŭkrainskaj haziecie "Siehodnia" Bierazoŭski zajaviŭ, što padziei 19-20 śniežnia 2010 hoda ŭ Miensku byli śpiecapieracyjaj rasijskich śpiecsłužbaŭ, a supracoŭniki biełaruskich śpiecsłužbaŭ pracujuć na Rasiju.
Jon adznačyŭ, što toje, što adbyłosia ŭ Biełarusi, «vyhadna Rasii i kateharyčna nie vyhadna ni Biełarusi, ni Zachadu».
«Rasieja atrymała nieabmiežavany ŭpłyŭ u hetaj krainie i, pa sutnaści, zahnała biełaruskija ŭłady ŭ kut.Łukašenka try hady vielmi paśladoŭna ruchaŭsia ŭ bok demakratyčnych pieraŭtvareńniaŭ», — kazaŭ biznesmien.
«Ale ŭ noč paśla vybaraŭ było pierakreślena ŭsio, što rabiłasia try hady. I ja liču, što heta, biezumoŭna, paśpiachovaja apieracyja rasiejskich śpiecsłužbaŭ, jakija, vykarystoŭvajučy svaju piatuju kałonu ŭ Biełarusi, zmahli pieraviarnuć situacyju».
Na jaho dumku, «nijakaj sproby zachopu domu ŭradu nie było».
***
Taksama ŭ 2010-2011 hh. zajaŭlałasia, što Bierazoŭski źviazany z šeraham biełaruskich čynoŭnikaŭ. Heta navat aficyjna ŭ lutym 2011 h. abvierh Łukašenka.
Tak, u lutym 2011 h. rasiejskija ŚMI paviedamili, što pry raskryćci sietki padpolnych kazino rasiejskija śpiecsłužby vyjavili mnostva dakumientaŭ, siarod jakich i sakretny natatnik kahości z kampańjonaŭ Bierazoŭskaha. U im mielisia źviestki ab suviaziach Bierazoŭskaha ź biełaruskimi čynoŭnikami.
Alaksandr Łukašenka tady zajaviŭ, što «ŭpieršyniu čuje» pra heta, ale adrazu pierajšoŭ da analizu:«Bierazoŭski ž u Rasiei nie žyvie, nakolki ja viedaju. Pa-mojmu, heta čarhovaja kačka, kamuści patrebnaja ŭ Rasii, kab jašče raz pakazać, što Baćka nie tym zajmajecca».
«Heta absalutnaja chłuśnia. Ja ŭ heta nie vieru», -- kazaŭ tady Łukašenka.
Kamientary