Miljanier Tapuzidzis praciahvaje zabudoŭvać Minskaje mora

U zacišnym kutku ŭ lesie pad Minskam miljanier buduje turystyčny kompleks. Dva tydni tamu na ŭčastku kala vioski Zarečča pačali začystku. Vysiakajuć dziasiatki drevaŭ: tapoli, biarozy, sosny, klony. Častka placoŭki — na ŭzhorku. Kali tut pabudavać dom, vid na vadu budzie šykoŭny. Tak i bačycca, jak Pavieł Hieorhijevič z kubkam ranišniaj kavy vychodzić na bałkon palubavacca piejzažam.

Navabud paŭstanie za 30 mietraŭ ad vadaschovišča Krynica (razam z Drazdami i Zasłaŭskim vydaschoviščam jano ŭtvaraje Minskaje mora).

Vodaachoŭnaja prybiarežnaja pałasa nie parušana. Chacia, vidać, sam miljanier byŭ by nie suprać budavać kala samaj vady. U adnym ź niešmatlikich intervju jon aburaŭsia, čamu jamu nie dazvolili pabudavać restaran u Robinson Slub naŭprost na bierazie Minskaha mora: «Ja nie razumieju, čamu ludzi pa ŭsim śviecie mohuć siadzieć u pryhožych prybiarežnych kaviarniach, ledź nie dastavać nahami da vady, paciahvajučy vino, a ŭ nas možna hladzieć na vodnuju roŭniadź tolki zdalok?»

Susied Maksa Mirnaha

Namieśnica dyrektara «Tytuń-inviest» (mienavita hetaja kampanija vystupaje inviestaram) Viktoryja Łapšova zajaviła, što jany pakul nie dajuć kamientaroŭ pra budoŭlu. Ale admaŭlać jaje fakt nie stała.

Niepasredna na miescy viedajuć nie našmat bolš.

U Ratamskim laśnictvie, jakoje zajmałasia vysiečkaj, adznačyli, što pad budaŭnictva zabranaja terytoryja ŭ 1,2 hiektary (kvadrat, umoŭna, 110 na 110 mietraŭ), pałova ź jakich padlahaje vysiečcy.

«Na asnovie rašeńnia abłvykankama ab vyklučeńni ziamli na budaŭnictva turystyčnaha kompleksu dla ekaturyzmu z padjaznoj aŭtadarohaj. U prajektnaj dakumientacyi prapisana i vysiečka lesu», — patłumačyli ŭ Minskaj lesaparkavaj haspadarcy. I papiaredzili mahčymyja razmovy pra niezakonnaść — usie dakumienty ŭ paradku.

Miascovyja žychary ličać, što terytoryja, na jakoj budujecca Pavieł Tapuzidzis, da niadaŭniaha času ŭvachodziła ŭ skład bijałahičnaha zakaźnika miascovaha značeńnia «Krynica». Ale dla patrebaŭ zabudovy hetuju ziamlu vyklučyli z achoŭnaj zony.

Miž inšym, miljanier stanie susiedam viadomaha tenisista Maksa Mirnaha. Za jakija paru dziasiatkaŭ mietraŭ znachodzicca dom alimpijskaha čempijona. Praŭda, sam jon pryjazdžaje redka. A voś žonka ź dziećmi bavić tut kožnaje leta.

Rezidencyja pad vyhladam turkompleksu

Bijałahičny zakaźnik miascovaha značeńnia «Krynica» zajmaje 178 ha. Jon byŭ stvorany dla zachavańnia naturalnych umoŭ vyrastańnia i pražyvańnia redkich i achoŭvanych raślin i źviaroŭ, jakija ŭklučany ŭ Čyrvonuju knihu.

A taksama dla padtrymańnia aptymalnaha hidrałahičnaha režymu i vysokaha ŭzroŭniu vady ŭ vadaschoviščy Krynica. Tam uviedzieny šerah abmiežavańniaŭ, u tym liku na vysiečku drevaŭ, budaŭnictva, prakładku inžyniernych kamunikacyj. Ale navat ciapier pa-za terytoryjaj budaŭničaj placoŭki rasstaŭlenyja paznaki dla prakładki hazpravodu.

Darečy, kali vyvad ziamli z zakaźnikaŭ respublikanskaha značeńnia patrabuje voli vyklučna kiraŭnika dziaržavy, to tyja, što adnosiacca da miascovaha značeńnia, vyvodziacca na ŭzroŭni nižejšym.

Chacia takaja praktyka nie novaja. U 2011 na Brasłaŭščynie, na bierazie voziera Vołas Paŭnočny, była pabudavanaja čarhovaja dziaržaŭnaja rezidencyja. Pryčym voziera ŭvachodziła ŭ Mižaziorny łandšaftny zakaźnik. Ale ŭ 2008 status zakaźnika źniali, a ŭviali «asablivyja zony», u jakija vadajom užo nie trapiŭ.

Pavieł Tapuzidzis naradziŭsia ŭ Abchazii (Hruzija). Pa adukacyi — inžynier-motabudaŭnik. Biznes pačynaŭ z vypusku płastmasavych samalocikaŭ. Zatym kiravaŭ kaapieratyvam «Płastykat», jaki zajmaŭsia vyrabam pachavalnych kvietak i viankoŭ. Žanaty, maje syna.

Źjaŭlajecca staršynioj praŭleńnia kampanii «Tytuń-inviest» — adzinaj pryvatnaj kampanii, jakoj u Biełarusi dazvoleny vypusk cyharet. Kampanii naležyć u tym liku sietka handlovych centraŭ «Karona», Robinson Slub, handlova-zabaŭlalny kompleks «Zamak» na prezidenckaj trasie ŭ Minsku.

• 0
• 0
• 0
• 0
• 0
• 0
• 0
• 0