«Napišy pra knihu, jakuju čytaješ». Pieršy biełaruski konkurs maładych krytykaŭ

Biełaruski PEN-centr sumiesna z sajtam bookster.by pačynaje konkurs maładych litaraturnych krytykaŭ imia Adama Babareki. Konkurs praciahniecca da 1 sakavika 2014 h.

Jak raspaviała radyjo «Svaboda» Hanna Jankuta, konkurs maje na mecie znajści ludziej, jakija zajmajucca ci cikaviacca biełaruskaj litaraturaj: «Apošnim časam davoli časta čujecca šmat narakańniaŭ, što ŭ Biełarusi ci mała, ci niama litaraturnaj krytyki, ci pišuć nie toje i nie tak. PEN-centr vyrašyŭ, što treba niešta mianiać, tamu prydumali heta konkurs».

Aŭtary najlepšych pracaŭ atrymajuć dypłomy i mahčymaść paŭdzielničać u admysłovych majstar-kłasach. Jak abiacajuć arhanizatary, majstar-kłasy buduć pravodzić jak biełaruskija admysłoŭcy, tak i zamiežniki. «Heta budzie abmien dośviedam roznych pakaleńniaŭ i roznych krainaŭ», — kaža Jankuta.

Arhanizatary taksama prahavarylisia, što pieramožcaŭ čakaje siurpryz, jaki pakul nie ahučvajecca.

Arhanizatary pakul nie viedajuć, kolki pracaŭ čakać na konkurs, ale papiarednie miarkujuć što heta budzie ličba ad 20 da 200.

Na pytańnie, ci litaraturnym krytykam moža stać kožny, Jankuta adkazała, što jość niekalki pryncypovych patrabavańniaŭ: «Litaraturny krytyk musić dobra raźbiracca ŭ litaratury. Luby čytač moža vykazać subjektyŭnaje čytackaje mierkavańnie, i jano budzie cikavaje. Kali čytač jašče vałodaje litaraturnym talentam, to moža napisać vydatnaje ese. A kali jašče maje i litaraturny hust, to krytyčnaje ese moža stać litaraturnym tvoram samo pa sabie».

Arhanizatary pakul nie viedajuć, kolki pracaŭ čakać na konkurs, ale papiarednie miarkujuć, što heta budzie ličba ad 20 da 200.

«My navat paspračalisia pamiž saboj, — kaža Jankuta. — Heta pieršy konkurs takoha typu. Raniej PEN-centr ładziŭ konkursy maładych litarataraŭ, i zaŭždy ciažka pradkazać kolkaść udzielnikaŭ. U lubym razie my płanujem šyrokuju rekłamnuju kampaniju». Naprykład, planujecca ŭkładać u knižki z kniharni Łohvinava zakładki z rekłamaj konkursa i słohanam: «Napišy pra knihu, jakuju čytaješ».

Pracy na konkurs prymajucca da 1 sakavika 2014 hodu. Teksty možna budzie dasłać praz sajt PEN-centra. Vyniki buduć abvieščanyja ŭ krasaviku.

* * *

Adam Babareka — biełaruski piśmieńnik i litaraturaznaŭca. Pavodle Vikipedyi, raspracoŭvaŭ mietadałahičnyja prablemy litaraturaznaŭstva i estetyki, pryncypy narodnaści, sacyjalnaj i estetyčnaj kaštoŭnaści litaratury, daśledavaŭ historyju biełaruskaj litaratury, tvorčaść Kupały, Kołasa, Bahdanoviča, Duboŭki, Čornaha. Adstojvaŭ pravy na volnaje tvorčaje samavyjaŭleńnie. Represavany ŭ 1938.

• 0
• 0
• 0
• 0
• 0
• 0
• 0
• 0