Na Mazyrskim NPZ aktyvisty niezaležnaha prafsajuza abviaścili haładoŭku
Staršynia Biełaruskaha kanhresu demakratyčnych prafsajuzaŭ (BKDP) Alaksandr Jarašuk nakiravaŭ zvarot ministru pracy i sacyjalnaj abarony Maryjanie Ščotkinaj u suviazi z haładoŭkaj prafsajuznych aktyvistaŭ na Mazyrskim naftapierapracoŭčym zavodzie. Haładoŭka pačałasia 14 kastryčnika.
Jaje abjaviŭ lidar Biełaruskaha niezaležnaha prafsajuza (BNP) Mazyrskaha NPZ Juryj Šviec u znak pratestu suprać nacisku na prafsajuznych aktyvistaŭ. Padstavaj dla akcyi pratestu stała zvalnieńnie piaci členaŭ BNP. Da haładoŭki Juryja Švieca dałučyŭsia i jaho namieśnik Vasil Alchoŭski. U svaju čarhu, u administracyi NPZ zajaŭlajuć ab zakonnaści zvalnieńnia členaŭ niezaležnaha prafsajuza.
U svaim zvarocie Alaksandr Jarašuk patrabuje ekstranna sklikać Saviet pa pytańniach udaskanalvańnia zakanadaŭstva ŭ sacyjalna-pracoŭnaj śfiery pry Ministerstvie pracy i sacabarony z zaprašeńniem na pasiadžeńnie administracyi Mazyrskaha NPZ i kiraŭnictva BNP dla «nieadkładnaha pryniaćcia mier pa spynieńni dyskryminacyi arhanizacyi i raspravy nad jaje členami».
«Kali z boku ŭrada nie buduć ažyćcioŭleny nieadkładnyja dziejańni pa spynieńni samavolstva i raspraŭ nad členami niezaležnych prafsajuzaŭ, ich dyskryminacyi, prykład ź Juryja Švieca i Vasila Alchoŭskaha mohuć uziać, pajšoŭšy na takija i jašče bolš adčajnyja akcyi pratestu, inšyja», — cytuje tekst zvarotu sajt BKDP.
«Pastajanny pieraśled rabočych za prynaležnaść da niezaležnych prafsajuzaŭ vymušaje ich advažvacca na radykalnyja dziejańni. BKDP nie moža i nie budzie abyjakava nazirać, jak učyniajecca nasille i rasprava nad členami jaho prafsajuzaŭ, i nie stanie abmiažoŭvacca tolki zajavami i zaklikami spynić biezzakonnaść i pakončyć ź biazładździem u dačynieńni da našych tavaryšaŭ», — havorycca ŭ zvarocie lidara kanhresu.
Tym časam haładoŭka ŭ Mazyry praciahvajecca. Jak paviedamiŭ Vasil Alchoŭski, jon i Juryj Šviec znachodziacca ŭ pracoŭnym kabiniecie. Pradstaŭniki administracyi ź imi nie źviazvalisia. Siońnia na zavod pavinien pryjechać Alaksandr Jarašuk i staršynia BNP Mikałaj Zimin.
BNP 15 kastryčnika vystupiŭ z zajavaj «Ab situacyi, što skłałasia na AAT «Mazyrski NPZ». U joj paviedamlajecca, što 16 kastryčnika pradstaŭniki prafsajuza majuć namier abmierkavać situacyju z kiraŭnictvam kancerna «Biełnaftachim».
«My spadziajemsia na cyvilizavanaje vyrašeńnie hetaj prablemy šlacham pieramoŭ. Adnak Biełaruski niezaležny prafsajuz ažyćciavić usie dastupnyja dziejańni pa abaronie zvolnienych členaŭ prafsajuza z vykarystańniem usich zakonnych mier», — padkreślivajecca ŭ zajavie.
Były ministr kultury Rusłan Čarniecki znajšoŭ sabie padpracoŭku9
Kamientary