Aficyjnyja dadzienyja ab kolkaści mihrantaŭ apublikavała Fiederalnaja mihracyjnaja słužba Rasii.
U zvodnaj tablicy ŭ ałfavitnym paradku pradstaŭlenyja statystyčnyja źviestki ŭ dačynieńni da pradstaŭnikoŭ 236 krain, «jakija znachodziacca na terytoryi Rasijskaj Fiederacyi, u połaŭzrostavym razrezie (pa stanie na 2 śniežnia 2013 h.)», pišuć «Biełaruskija naviny».
Što da «połaŭzrostavaha razrezu», to z 385 149 čałaviek 243 210 — mužčyny, ź ich 219 040 va ŭzroście ad 18 da 59 hadoŭ. Astatnija mihranty ź biełaruskimi pašpartami — dzieci da 17 hadoŭ (16 974) i ludzi, starejšyja za 60 (7196).
Našych žančyn u Rasii, pavodle dadzienych FMS, 141 939. Ź ich 117 801 — va ŭzroście ad 18 da 59 hadoŭ. Adpaviedna, astatnija hramadzianki Respubliki Biełaruś — va ŭzroście da 17-ci (16 097) i starejšyja za 60 hadoŭ (8041).
Hrafa «Biełaruś» u tablicy zajmaje 22-ju pazicyju, adnak pa kolkaści hramadzian na terytoryi ad Kalininhrada da Kamčatki biełarusy sastupajuć tolki hramadzianam:
Uźbiekistana — 2 620 000 čałaviek;
Ukrainy — 1 610 000 čałaviek;
Tadžykistana — 1 194 000 čałaviek;
Azierbajdžana — 620 000 čałaviek;
Kazachstana — 599 000 čałaviek;
Kyrhyzstana — 571 000 čałaviek.
Asabliva varta adznačyć, što heta aficyjnaja statystyka rasijskaha boku.
Raniej padliki z boku biełaruskich struktur nasili vielmi pryblizny charaktar i adnosilisia vyklučna da pracoŭnych mihrantaŭ. Naprykład, zhodna ź biełaruskim pierapisam nasielnictva 2009 hoda, u Rasii pracavali 37 676 biełarusaŭ.
Ale heta vidavočna zanižanaja ličba, bo jana ŭklučała tolki tych ludziej, jakija pracavali ŭ čas praviadzieńnia pierapisu, to bok u kastryčniku 2009 hoda. Pry hetym biełaruskija čynoŭniki sami nieadnarazova ŭkazvali na niaŭličanyja pamiery nielehalnaj pracoŭnaj mihracyi.
Tak, u 2006 hodzie načalnik Departamienta pa hramadzianstvie i mihracyi MUS Biełarusi Alaksiej Biahun, spasyłajučysia na dadzienyja rasijskich ekśpiertaŭ, vykazaŭ zdahadku, što ŭ Rasii nielehalna pracuje 150-300 tysiač biełarusaŭ. Treba razumieć, što apublikavanaja FMS RF ličba ŭ amal 400 tysiač hramadzianaŭ Biełarusi, jakija znachodziacca ŭ Rasii i vidavočna pracujuć, daje padstavu analitykam acanić realnyja pracoŭnyja straty dziaržavy z usimi nastupstvami.
Kamientary