Piać faktaŭ pra Nadzieju Skardzina

Biełaruskaja spartsmienka stała treciaj u indyvidualnyj honcy na sočynskaj Alimpijadzie.

Vyrasła ŭ šmatdzietnaj siamji

U Nadziei dva braty, a taksama čatyry siastry. Adna ź siaścior Safija zajmałasia łyžnymi honkami. Samaja małodšaja — Maryja — krychu pahulała ŭ tenis. Adnak samym spartyŭnym u siamji jana nazyvaje plamieńnika Ściapana, jaki hulaje ŭ futboł. Kaža, što ŭ chłopčyka vialikaja budučynia.

Radzimaj ličyć dźvie krainy

Na pytańnie, kim Nadzieja siabie ličyć bolš, biełaruskaj ci ruskaj, bijatłanistka adkazvaje, što abiedźvie krainy dla jaje rodnyja. Jana naradziłasia ŭ Sankt-Pieciarburzie, ale apošnija dzieviać hadoŭ biehaje mienavita za Biełaruś.

«Z horadam ja vyznačyłasia. Moj rodny horad — Sankt-Pieciarburh. A tak — ja i ruskaja, i biełaruska. «U Biełarusi ludzi niejkija dabrejšyja. Heta ja zaŭvažyła, kali pryjechała ŭ Picier i zašła tam u mietro. Usie niejkija złyja, zasiarodžanyja. Biełarusy bolš raźniavolenyja».

Pryjšła ŭ bijatłon z łyžaŭ

Ciažka pavieryć, ale Nadzieja nie zaŭsiody zajmałasia ź vintoŭkaj. Ciapier jana kaža, što «stralba — heta kajf». U bijatłon Skardzina pryjšła z łyžnych honak, dzie ŭ jaje nie ŭsio kleiłasia. Navat źbirałasia skončyć spartyŭnuju karjeru.

Pakolki pasprabać siabie ŭ bijatłonie prapanavaŭ biełaruski trenier Zacharaŭ, to i vystupać jana pačała ŭ składzie našaj kamandy. Bijatłonam u Rasii Skardzina nie zajmałasia nikoli. Faktyčna vyrasła spartsmienam vysokaha kłasa mienavita ŭ našaj krainie.

Prablemy z vačyma

Ciapier ža Nadzieja — adna z samych trapnych bijatłanistak śvietu. U studzieni jana ŭstalavała suśvietny rekord, kali prajšła siamnaccać honak biez pudła.

Asabliva heta ŭražvaje, kali ŭzhadać, što Skardzina maje chvarobu vačej — astyhmatyzm, pry jakim zrok horšaje. «Chvaroba źjaviłasia, bo ja časta stralała i vočy časta byli napružanyja, zrok mocna pahoršaŭ za karotki pieryjad», — kazała Nadzieja. Potym jana zrabiła apieracyju, adnak daktary nie abiacajuć, što chvaroba ŭžo nikoli nie vierniecca.

Minijaturnaja

Bijatłon — heta zusim nie sport vialikich ludziej. Rost Nadziei 160 sm, a vaha — 50 kiłahram. Pry hetym jana navat nie samaja maleńkaja bijatłanistka, niemki Chienkiel i Hiosner jašče mienšyja.

Svaimi chobi jana nazyvaje plažny valejboł, a taksama… viazańnie. «Sam praces vydatna supakojvaje. Viažu što-niebudź nieskładanaje — rukavički dy škarpetki dla plamieńnikaŭ».

Na zborach jana žyvie ŭ adnym pakoi z Darjaj Domračavaj.

• 0
• 0
• 0
• 0
• 0
• 0
• 0
• 0