Ekałahičnyja aktyvisty damahlisia pabudovy na samym vialikim vierchavym bałocie Biełarusi admysłovaj ekaściežki. Ciapier u amataraŭ niezvyčajnaha pryhožaha adpačynku źjaviłasia novaja meta na mapie Biełarusi.
Bałotny masiŭ Jelnia znachodzicca ŭ Viciebskaj vobłaści, blizu horada Miory. 25 lipienia tam adkryłasia ekaściežka, što viadzie da azioraŭkaŭ –- nievialikich bałotnych azioraŭ z vyspami.
Praź viosačku Kanachi, jakuju abstupiŭ barščavik u rost čałavieka, i, padajecca, chutka zachopić; pieššu pa lasnoj darozie i 1,5 kiłamietra prosta pa bałocie, kudy b nie navažyŭsia sunucca sam i dzie miascovyja miachami źbirajuć žuraviny — heta ty, chto apynuŭsia la samaha dzikaha bałota Biełarusi i idzie pa pieršaj u krainie ekaściežcy.
Miescami tut budaŭniki ciahali doški na svaich rukach, uviosnu – u humavych kaściumach pa plečy, a 25 lipienia 2014 hodu ekaściežka pačała prymać haściej. Budoŭla išła hod i skončyłasia dva tydni tamu. Ekaściežku zrabili za hrošy PRAAN, Jeŭrasajuza i miascovych uładaŭ, ukłaŭšy kala 120 000 dalaraŭ. Hrošy patrebnyja byli ŭ tym liku na admysłovuju draŭninu, jakaja b nie hniła ad pastajannaj vilhaci.
Jechać da bałota daviadziecca nie pa trasie, a pa viaskovaj darozie. Apošni adrezak u kiłamietr-dva lohka prajści i prajechać letam, ale tolki ŭ humovikach – viasnoj. Sama ściežka — draŭlany naścił šyrynioj kala 1,5 mietra. Pa bakach -– trava, drobnaje kustoŭje, nievysokija bałotnyja dreŭcy.
Tut možna pasłuchać ekskursiju, jakuju ładzić vizit-centr u Miorach, pachadzić na bałotastupach pa sfahnumu, panazirać za ptuškami ŭ binokl z naziralnaj viežy. Taksama ŭzdoŭž ekaściežki jość infarmacyjnyja stendy pra bałota i jaho žycharoŭ.
«U nas tolki zaraz pačali prychodzić da taho, kab raźvivać ekaturyzm u zakaźnikach i davać mahčymaść ludziam paznajomicca ź dzikaj pryrodaj u zakaźnikach», — kaža Volha Kaskievič z kampanii «U abaronu biełaruskich bałot». Volha i inšyja aktyvisty kampanii addajuć siły na ŭratavańnie jašče vaśmi bałot Biełarusi, jakija znachodziacca pad pahrozaj torfazdabyčy.
Pavodle Volhi, ekaściežka ŭ paŭtary kiłamietry –- nie tak šmat, i toj, chto žadaje, moža sam pajści dalej pa bałocie -– aściarožna, ale viedajučy, što ŭ vierchavym bałocie nielha zaviaznuć – heta tolki mif.
«Dla Biełarusi heta ŭnikalnaja ściežka, — kaža Kanstancin Čekałaŭ. – U miežach našaj kampanii my ŭvieś čas ahučvali ideju stvareńnia takich ekaściežak, tamu što dla Biełarusi heta niešta novaje i pierśpiektyŭnaje dla pryciahvańnia turystaŭ ź Jeŭropy, dzie takich bałot nie zastałosia».
Ciapier čytajuć
U turmie pamior były supracoŭnik KDB Mikałaj Varapaj, asudžany za špijanaž na karyść Ukrainy1
Kamientary