Z-za devalvacyi biełaruskaha rubla aŭtamabilnaje paliva ŭ dołaravym ekvivalencie patańnieła na čverć, śviedčyć praviedzienaje BiełaPAN paraŭnańnie cen.
Apošni raz kancern «Biełnaftachim» pavyšaŭ ceny 1 kastryčnika 2014 hoda, pryviazaŭšy canu bienzinu Ai-92-K5-Jeŭra da amierykanskaj valuty: 1 litr — 1 dołar. Pry aficyjnym kursie na hety dzień 10.590 rubloŭ košt hetaj marki bienzinu byŭ ustanoŭleny na ŭzroŭni 10.600 rubloŭ. Bienzin Ai-95 staŭ kaštavać tady 11.400 rubloŭ (1,08 dołara), dyzpaliva (samaje tannaje) — 11.500 (1,09), «Narmal-80» — 9.550 (0,90).
Prymianieńnie indeksacyi roźničnych cen u zaležnaści ad kursu dołara da biełaruskaha rubla «dazvolić spałučać dziaržaŭnaje i rynačnaje rehulavańnie cen i nablizić dziejučy ŭ Respublicy Biełaruś miechanizm cenaŭtvareńnia na aŭtamabilnaje paliva da suśvietnaj praktyki», havaryłasia ŭ abhruntavańni «Biełnaftachima».
Novy miechanizm «daść mahčymaść naftapierapracoŭčym zavodam bolš apieratyŭna reahavać na źmianieńni koštu naftavaj syraviny, jakuju biełaruskija naftapierapracoŭčyja zavody nabyvajuć u Rasijskaj Fiederacyi pa pieradapłacie tolki za valutu». «Uzrovień cany 1 litra indykatyŭnaj marki bienzinu Ai-92-K5-Jeŭra, raŭnaznačny 1 dołaru, dazvolić zabiaśpiečvać minimalnuju efiektyŭnaść pracy naftapierapracoŭčych zavodaŭ Respubliki Biełaruś i mahčymaść dla ich dalejšaj madernizacyi», — zaznačałasia ŭ pres-relizie.
Na 13 studzienia 2015 hoda aficyjny kurs dołara składaje 14.310 rubloŭ. Takim čynam, košt bienzinu Ai-92-K5-Jeŭra źniziŭsia da 0,74 dołara (na 26%), Ai-95 — da 0,80 (na 25,9%), dyzpaliva — taksama da 0,80 (na 26,7%), «Narmala-80» — da 0,67 (na 25,6%).
Miž tym biełaruski bienzin pa-raniejšamu daražejšy za rasijski, jaki značna patańnieŭ u dołaravym ekvivalencie ŭ vyniku dvuchrazovaj devalvacyi hrašovaj adzinki RF. Košt Ai-95 vyšejšy ŭ siarednim na 40,4%, Ai-92 — na 42,3%, dyzpaliva — na 48,1%. Niamała biełaruskich aŭtaŭładalnikaŭ z pryhraničnych rajonaŭ zaraz zapraŭlajucca ŭ Rasii, choć raniej było naadvarot.
Pavodle nieaficyjnaj infarmacyi, 13 studzienia aŭtamabilnaje paliva ŭ Biełarusi padaražeje, ale nie ŭ adpaviednaści z uzroŭniem devalvacyi rubla, a na 4—5%. Tym nie mienš heta jašče bolš pavialičyć roźnicu ŭ canie na AZS dźviuch krain.
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1
Kamientary