In memoriam. Jury Šyroki
Svajo karotkaje žyćcio — 36 hadoŭ — jon pražyŭ nasyčana, plonna, u šyrokim sensie tvorča i talenavita. Biez zališniaha palityčnaha patasu, niazmušana dy ŭśmiešliva ščyravaŭ na nivie niezaležnaj biełaruskaj žurnalistyki.
U minułuju piatnicu jon doŭha i šumna, jak zaŭždy — z žartami, raźvitvaŭsia z kalehami ŭ ofisie infarmacyjnaj kampanii BiełaPAN. Raźvitvaŭsia na ŭikend, žadaŭ usim viesieła sustreć stary Novy hod. Akazałasia — raźvitaŭsia nazaŭsiody.
Ranicoj u niadzielu jahonaje cieła "bieź vidavočnych paškodžańniaŭ" znajšli na vulicy ŭ Smarhoni (u tyja miaściny Jura vybraŭsia na vychodnyja vudzić rybu). Ekspertyza kanstatavała "vostruju sardečnuju niedastatkovaść".
Kali chtości sychodzić raptoŭna, zaŭždy kažuć: nia vierycca… Tut — nia vierycca ŭ kvadracie. Bo Jury Šyroki byŭ sapraŭdy šyrokaj naturaj, uvasableńniem žyćciaradasnaści. Jahony impet, zajzdrosnaja kantaktnaść dy pačuććcio humaru nia tolki spryjali menedžerskim spravam u jakaści namieśnika dyrektara BiełaPANu, ale i stvarali ŭ kalektyvie niazmušanuju atmasferu, tak nieabchodnuju, kali pracuješ na suvorym infarmacyjnym kanvejery. A ŭ volnuju chvilinu Jura stanaviŭsia azartnym spartoŭcam ci dušoju kampanii.
Adnym ź jahonych amplua było pierakładčyckaje. Jura, vydatna viedajučy anhielskuju dy inšyja movy, byŭ niezamienny što da pracy z zamiežnymi spažyŭcami infarmacyi, inšaziemnymi surazmoŭcami i haściami BiełaPANu. U tym, što siońnia brend hetaj niezaležnaj biełaruskaj ahiencyi viedajuć u śviecie, — niesumniennaja zasłuha Jurja Šyrokaha.
Adnačasna jon byŭ adnym z tych, chto stvaraŭ pad dacham BiełaPANu asiarodak žyvoj biełaruskaj movy.
Kali ŭ ahiencyi nie stavała volnych pioraŭ, Jura terminova zakryvaŭ haračuju tematyčnuju nišu ŭłasnym materyjałam. Pry patrebie chutka i jakasna rabiŭ reparterskuju pracu. Vydavaŭ bliskučyja, jarkija aŭtarskija artykuły na sajcie "Biełaruskich navinaŭ". Škadavaŭ, što praz administracyjnyja kłopaty nie staje času na ŭłasnuju tvorčaść.
Razam z tym, svajo karotkaje žyćcio — 36 hadoŭ — jon pražyŭ nasyčana, plonna, u šyrokim sensie tvorča i talenavita. Biez zališniaha palityčnaha patasu, niazmušana dy ŭśmiešliva ščyravaŭ na nivie niezaležnaj biełaruskaj žurnalistyki. I prosta žyŭ napoŭnicu, z nadzvyčajnaj ščodraściu adorvajučy inšych dobrym nastrojem.
U Jurja Šyrokaha zastałosia mnostva siabroŭ. A tamu zastajecca doŭhaja i ščyraja pamiać pra śvietłaha čałavieka.
* * *
Redakcyja "Našaj Nivy" ščyra spačuvaje rodnym i blizkim Jurja Šyrokaha z pryčyny jahonaj śmierci.
Ciapier čytajuć
Staŭ viadomy dakładny adras, pa jakim žyvie Anžalika Mielnikava ŭ Minsku44
Kamientary