Pradprymalniki źbirajucca masava sychodzić ź biźniesu paśla 1 sakavika

Mnohija pradprymalniki nie zmohuć pracavać paśla 1 sakavika 2015 hoda, kali skončycca vyznačany ŭładami krainy termin rasprodažu tavarnych reštkaŭ bieź siertyfikataŭ zhodna z techrehłamientam Mytnaha sajuza.

Pavialičyć

Pra heta zajavili bolšaść pradprymalnikaŭ, jakija vystupili 16 lutaha ŭ Minsku na forumie «Mety i zadačy dla małoha biźniesu Biełarusi», arhanizavanym RHA «Pierśpiektyva». Usiaho ŭ forumie ŭziali ŭdzieł kala 1200 čałaviek z usich rehijonaŭ Biełarusi.

Nahadajem, 1 lipienia 2014 hoda nabyŭ moc ukaz prezidenta № 222, pryniaty ŭ padtrymku techrehłamientu Mytnaha sajuza (MS) «Ab biaśpiecy pradukcyi lohkaj pramysłovaści». Ukaz abaviazaŭ IP mieć siertyfikaty adpaviednaści zhodna z techrehłamientam MS na ŭsie ŭviezienyja ŭ Biełaruś tavary. Reštki tavaraŭ, uviezienyja da taho, jak nabyŭ moc ukaz, dazvolena pradavać pa starych praviłach da 1 sakavika 2015 hoda. 

Na forumie pradprymalnik z Homiela Śviatłana Kałačova raskazała pra składanaści, ź jakimi IP sutykajucca ŭ Rasii, kab atrymać na tavar sapraŭdnyja dakumienty. Pavodle jaje mierkavańnia, pryniaćcie ŭkaza № 222 «stavić pradprymalnickuju dziejnaść na hrań». «Mabyć, ułady pastavili pierad saboj zadaču źniščyć nas jak kłas ci rasčyščajuć pole dla našych kankurentaŭ. Ale my taksama vaš narod», — adznačyła jana, źviartajučysia da ŭład. 

Pavodle słoŭ IP z Babrujska Siarhieja Filipava, bolšaść apytanych pradprymalnikaŭ horada paviedamili, što pakinuć biźnies paśla 1 sakavika. «Chtości pajedzie pracavać u Rasiju, a chtości zojmiecca prodažam siarod znajomych i siabroŭ», — skazaŭ Filipaŭ. Pavodle jaho mierkavańnia, nieabchodna paviedamlać spažyŭcu infarmacyju pra toje, što tavar nie siertyfikavany, i jon sam budzie vybirać, kuplać taki tavar ci nie. Pradprymalnik taksama adznačyŭ prablemu prodažu tavaraŭ lohkaj pramysłovaści zamiežnymi hramadzianami na šmatlikich kirmašach. Akramia taho, IP nie vytrymajuć vysokuju arendnuju staŭku, pakolki «prodažy amal skončylisia z pryčyny źnižeńnia ŭzroŭniu žyćcia». 

Jak ličyć pradprymalnik z Mahilova Alaksiej Vałatko, «prablema ŭ krainie ŭ tym, što zakony prymajucca biez abmierkavańnia z tymi, kamu ich vykonvać». Na jaho dumku, nieabchodna pryniać dakumient ab dziaržaŭnym rehulavańni arendnaj płaty. Jon taksama ličyć nieabchodnym nie ŭskładać adkaznaść za siertyfikacyju tavaru na pradprymalnikaŭ roźničnaha handlu. «Hetym pavinny zajmacca vytvorcy tavaru ci aptaviki», — ličyć Vałatko. 

«Pradprymalniki ŭ ciapierašniaj ekanamičnaj situacyi stajać tydniami, ničoha nie pradajučy. Reštki zaŭsiody buduć, heta źviazana z tym, što pradstaŭlajecca ŭsia raźmiernaja liniejka, ale nie ŭsio pradajecca. Z 1 sakavika nichto nie budzie stajać i hladzieć, jak u ludziej adymajuć tavar, adymajuć apošniaje, ich zdaroŭje», — ličyć pradprymalnik z Bresta Alena Kustus. Pavodle jaje mierkavańnia, ułady abaviazanyja ŭličvać intaresy pradprymalnikaŭ. «Spadarstva čynoŭniki, nie prosta słuchajcie nas, a narešcie pačujcie!» — zajaviła jana. 

Pradstaŭniki ŭład, jakija prysutničali na formie, u čarhovy raz zajavili, što termin zakančeńnia rasprodažu reštkaŭ tavaraŭ minaje 1 sakavika i pierahladacca nie budzie.

• 0
• 0
• 0
• 0
• 0
• 0
• 0
• 0