Hruzapieravozčyk Štoda — vice-premjeru Maciušeŭskamu: Pakul vas nie źniali, jak Jermakovu, zrabicie štości dla ludziej

Siońnia ŭ ofisie Abjadnanaj hramadzianskaj partyi prajšła pres-kanfierencyja Siarhieja Štody, jaki adstojvaje pravy hruzapieravozčykaŭ, što paciarpieli, na jaho dumku, ad niedaskanałaściaŭ sistemy apłaty daroh BelToll. Dva tydni tamu, 3 lutaha, Štoda zaklikaŭ pieravozčykaŭ pryjści da parłamienta na pratestnuju akcyju. Adnak jaho zatrymali i prysudzili da 15 sutak aryštu nibyta za niecenzurnuju łajanku ŭ hramadskim miescy.

Sam Siarhiej śćviardžaje, što jaho «pa-zdradnicku» zatrymali nibyta «pavodle zahadu KDB»:

«U studzieni mianie zapisali na pryjom da pieršaha namieśnika premjer-ministra Vasila Maciušeŭskaha na 4 studzienia, ale zatym vizit pieranieśli na 3 lutaha. Kali ja pryjšoŭ u pryznačany čas, daviedaŭsia, što sustreča znoŭ pieraniesienaja. A pa vychadzie mianie zatrymali supracoŭniki AMAP. Liču, što pa-zdradnicku. Bo tak nie robiać narmalnyja ludzi, u tym liku ŭłada, u tym liku milicyja.

Zatrymańnie było karektnaje. AMAPaŭcy vybačalisia, kazali, maŭlaŭ, my razumiejem, ale patłumačyli, što jość zahad ad KDB mianie aryštavać. Asudzili na 15 sutak nibyta za niecenzurnuju łajanku. Ja chaču ŭdakładnić: ja navat pa telefonie nie paśpieŭ pahutaryć. Da mianie adrazu padyjšli, pakazali dakumienty, skazali prajści ź imi. (…) Na sudzie ja pryznaŭ vinu, skazaŭ, što nasamreč skazaŭ adno niecenzurnaje słova, bolš tak nie budu — inakš mnie dali b bolš za 15 sutak».

«U CIP na Akreścina prablem nie było, — kaža Štoda, — adzinaje, što supracoŭniki šaptalisia: «palityčny, palityčny». Nu jaki ja «palityčny»? Zvyčajny hramadzianin… Ja tolki adstojvaju svaje pravy. U mianie niama nijakich pohladaŭ, čym zajmajumsia, chaj tym i zajmajucca. Ja tudy nie lezu. A paśla hetych sutak, viadoma, budu leźci!»

Štoda kaža, što pieravozčyki byli hatovyja pryjści da Doma ŭrada, ale nie zrabili hetaha, bo nie było sihnału:

«Pieravozčyki dziejničali pa instrukcyi. Spačatku ja idu da Maciušeŭskaha, a potym telefanuju i źbiraju ludziej. Ludzi tamu i nie pryjšli, što nie było sihnału. I dobra što nie pryjšli. Na Akreścina vyzvalili dva pavierchi: kamiery stajali z adčynienymi dziaryma. Čałaviek 500 raźmiaścić miesca b chapiła», — śćviardžaje jon.

Pavialičyć

Štoda adznačyŭ, što paśla Novaha hoda ŭ supracy inicyjatyŭnaj hrupy hruzapieravozčykaŭ z čynoŭnikami adbylisia značnyja źmieny:

«Transpartnaja inśpiekcyja, Mintrans, Ministerstva finansaŭ, Ministerstva justycyi — my z usimi razmaŭlali, z usimi byŭ dyjałoh. Paśla Novaha hoda dyjałoh spyniŭsia».

«Čamu ja aktyŭna zavarušyŭsia paśla Novaha hoda? Bo pieravozčyki skazali, što pačali błakavać raźlikovyja rachunki. U mianie ŭ samoha bank zabłakavaŭ rachunak, ja ciapier faktyčna biespracoŭny. Nu i va ŭradzie adbylisia pierastanoŭki: pryjšli novyja ludzi: Maciušeŭski, Kačanava (vice-premjer Biełarusi — K.Ch.). Ja padumaŭ, što ź imi možna budzie vieści dyjałoh, a mnie zładzili voś taki «ciopły pryjom» i załamali ruki. Tamu napišycie, kab Maciušeŭski pomniŭ: jany — Maciušeŭski, Kačanava — jany nie buduć na hetym miescy viečna, jany ŭsie mianiajucca. Vas usio adno prybiaruć, jak Jermakovu ci Prakapoviča. Ale pakul vy ŭ hetym kreśle, kali łaska, zrabicie što niebudź dla ludziej!»

Siarhiej Štoda kaža, što čynoŭniki musiać abjavić amnistyju pa štrafach za pieršyja 3 miesiacy funkcyjanavańnia sistemy BelToll:

«Vyrašyć prablemu prosta — treba ŭnieści papraŭki ŭ pastanovu №340 (pastanaŭleńnie Saŭmina «Ab zaćviardžeńni Pałažeńnia ab paradku źbirańnia płaty za prajezd transpartnych srodkaŭ pa płatnych aŭtamabilnych darohach Respubliki Biełaruś i uniasieńni dapaŭnieńniaŭ i źmianieńniaŭ u niekatoryja pastanovy Savieta Ministraŭ Respubliki Biełaruś» — K.Ch.) pra toje, što pieršyja try miesiacy pracy sistemy Beltoll treba ličyć testavym pieryjadam, i dać za hetyja miesiacy pasłableńni. Bo parušalńni praź niedaskanałaść sistemy byli tolki ŭ hetyja try miesiacy».

«Čamu zamiežnikaŭ, jakija da nas jeduć, spyniali adrazu i kazali, maŭlaŭ, u ciabie štraf 500 jeŭra, apłaci. I ŭsio, bolš nie było prablem. A mianie spyniajuć tolki praz paŭhoda i kažuć: da ty ŭ nas parušalnik, na ciabie składziena bolš za sto aktaŭ. Čamu ŭ mabilnych apierataraŭ pry zapazyčanaści na bałansie prychodzić sms-paviedamleńnie, a BelToll nie zdoleŭ zrabić takoje apaviaščeńnie?» — aburajecca Štoda.

Štoda paviedamiŭ što ŭ asnoŭnym u hruzapieravozčykaŭ, jakija źviartalisia da jaho nakapiłasia da 10 tysiačaŭ jeŭra štrafu. Siarod pradpryjemstvaŭ jak i pryvatnaja kampanii, tak i dziaržaŭnyja: ahrakambinaty, małakazavody, chlebazavody, navat MNS i miechanizavanaja ŭborka horada.

Pavialičyć

Razam sa Štodam na pres-kanfierencyju pryjšła Julija Hryškievič, dyrektarka firmy hruzapieravozak, jakaja musić apłacić 24 tysiačy jeŭra štrafu.

 «U mianie šeść aŭtamabilaŭ. Pryłady apłaty ja atrymała ŭ naležny čas i asabista razdała kiroŭcam usim maich šaści aŭtamabilaŭ. Adnak ja zamaŭlała pryłady na piacivosievyja aŭtamabili, a mnie vydali na dvuchvosievyja. Pra toje, što mnie samastojna treba źmianić kolkaść vosiej, nie było ŭkazana ni ŭ damovie, i ŭ instrukcyjach, ni ŭ kalarovych bukletach, jakija nam razdali. Nichto pra heta nie papiaredziŭ. A pieršyja try miesiacy nie pracavaŭ asabisty kabiniet BelToll, choć pisała zajavu adrazu paśla atrymańnia pryład. Tamu hrošy kłalisia na rachunak litaralna ŭślapuju», — raskazała Julija karespandentu «NN».

Štoda nie źbirajecca apłačvać svaje štrafy, bo nie pryznaje svajoj viny:

«Ja svoječasova za ŭsim sačyŭ, a mnie pryjšli 36 aktaŭ pa 260 jeŭra. Pieršy ja apłaciŭ, inšyja nie budu apłačvać pryncypova. I jany heta pryznavali i pryznajuć, ale nie chočuć ahučvać».

• 0
• 0
• 0
• 0
• 0
• 0
• 0
• 0