Minsk staŭ samym biaśpiečnym horadam dla piešachodaŭ u SND i krainach Bałtyi
Eŭrapiejskaha ŭzroŭniu darožnaj biaśpieki dasiahnuła biełaruskaja stalica. U Vilni, Ryzie i Varšavie imaviernaść taho, što ciabie sabjuć na darozie, — bolšaja. Na darohach u Miensku letaś zahinuła 44 čałavieki. Heta rekordna nizki pakazčyk, jaki stavić horad na adzin uzrovień z Prahaj, Bruselem i Budapeštam.
«Takoje źnižeńnie — heta vynik metanakiravanaj systemnaj pracy ŭ apošnija dziesiać hadoŭ», — raskazaŭ Svabodzie Jury Važnik, kiraŭnik hramadzkaha abjadnańnia «Biełaruskaja asacyjacyja ekspertaŭ i siurvejeraŭ na transparcie».
Pryniataja ŭ 2011 hodzie Mienskim haradzkim savietam deputataŭ kancepcyja «Dobraja daroha» praduhledžvała źmianšeńnie kolkaści zahinułych u DTZ ludziej u paŭtara raza — kab u 2015 hodzie było nia bolš za 45 čałaviek.
«Heta vielmi značnaje dasiahnieńnie, — kaža Važnik. — U nas vynik u dva razy lepšy, čym u lubym horadzie SND. Miensk bolš biaśpiečny za Vilniu, Ryhu j Varšavu. Ciapier možna kanstatavać, što ŭ nas eŭrapiejski ŭzrovień biaśpieki darožnaha ruchu».
Dziela paraŭnańnia: u 1990-ja i ŭ pieršuju pałovu 2000-ch na mienskich darohach hinuła da 130 čałaviek na hod.
«Kožny «lažačy palicejski», śviatłafor, pryviedzienyja da ładu mahistrali, naležny kantrol — usio heta robić peŭny ŭniosak u ahulnuju biaśpieku, — kaža Važnik. — Kali prytrymlivacca metaŭ, majem taki vynik».
U tablicy, jakuju rehularna abnaŭlajuć u BAES, statystyka pryviedziena pa eŭrapiejskich haradach u pieraliku na nasielnictva Miensku. Zhodna ź joj, kolkaść zahinułych u Vilni i Kijevie ŭ dva razy bolšaja, čym u nas, a ŭ Maskvie — u try razy.
«Adnak nam jašče jość kudy raźvivacca, — kaža Važnik. — Jość jašče takija vielmi biaśpiečnyja ŭzory, jak Berlin i Stakholm, dzie avaryjnaść udvaja mienšaja».
Aktualnaj prablemaj biaśpieki staličnych daroh zastajecca dziciačaja avaryjnaść.
«Prablema ŭ tym, što mahistralnyja darohi dla dzietak nia samyja niebiaśpiečnyja, — tłumačyć Važnik. — Našmat čaściej dzieci traplajuć u avaryi ŭ dvarach i na małych vulicach».
U BAES prapanujuć vykarystoŭvać sučasnyja technalohii — mabilny dadatak «Safetymeter». Prahrama, jakaja złučajecca z GPS, dazvalaje baćkam paznačyć na mapie svajho rajone niebiaśpiečnyja dla dziaciej darožnyja ŭčastki.
Drennaje aśviatleńnie, vysokaja chutkaść, tranzytny ruch, zakarotki zialony syhnał śviatłafora na pierachodzie — kali paznačyć vid niebiaśpieki, jon adlustrujecca na interaktyŭnaj mapie. Kali pra peŭnaje miesca pačnuć paviedamlać roznyja baćki, vyrašać prablemu pryjeduć specyjalisty.
«Voś u testavym režymie ad baćkoŭ pastupaje kolki paviedamleńniaŭ pra prajezd kala škoły, — pakazvaje žoŭtyja kropki na mapie Važnik. — Na hetym učastku darohi treba było b zrabić tak zvanuju pikap-zonu dla vysadki dziaciej z aŭtamabilaŭ, dzie parkoŭka i zadni chod niemahčymyja: zajechaŭ, vysadziŭ ci pasadziŭ dzicia, pajechaŭ dalej».
Prahrama ŭžo prachodzić testavaje vyprabavańnie ŭ dzieviaci škołach horadu. Spampavać i skarystać jaje moža chto zaŭhodna. Ź pieršaha vieraśnia jana budzie rekamendavanaja baćkam usich škołaŭ.
Kamientary